16 январь куни Сурхондарё вилоятида жойлашган Тангимуш ва Оқжар станциялари оралиғидаги темир йўл кесишмасида Damas йўловчи поездининг ён томонига урилиб, йўл-транспорт ҳодисасини содир этди. Бу ҳақда ИИВ Транспортда хавфсизликни таъминлаш бош бошқармаси хабар берди.
Маълум қилинишича, Damas автомобили светофорнинг қизил чироғига қарамай, темир йўл кесишмасидан ўтмоқчи бўлиб, Тошкент—Термиз йўналиши бўйлаб ҳаракатланиб келаётган йўловчи поездининг ён томонига урилган.
Йўл-транспорт ҳодисаси натижасида автомашина ҳайдовчиси, 1995 йилда туғилган С.Х. олган жароҳатлари туфайли касалхонага олиб кетилган. Бироқ унга кўрсатилган тиббий муолажаларга қарамай, ҳайдовчи вафот этган.
«Поезд воқеа жойида 13 дақиқа туриб, сўнг ҳаракатини давом эттирган. Поезд йўловчилари орасида қурбонлар ва жароҳат олганлар йўқ», — дейилади хабарда.
Аввалроқ Юнусободда темир йўл светофорининг тақиқловчи белгисидан ўтиб кетган Nexia ва Lacetti ЙТҲга учрагани, Фарғонада шлагбаумни айланиб ўтмоқчи бўлган юк машинаси поезд билан тўқнашгани, Бухорода 69 ёшли фуқаро йўловчи поезди уриб кетиши оқибатида ҳалок бўлгани ҳамда Сурхондарёда тепловоз Matiz’ни уриб юборгани ҳақида хабар берилганди.
Изоҳ (0)