Францияда шифокорлар дунёда биринчи маротаба беморга иккита қўл ва елкани кўчириб ўтказиш бўйича операцияни ўтказди, деб хабар беради «Korrespondent.net».
The Guardian нашрининг ёзишича, 48 ёшли Исландия фуқароси Феликс Гретарссон қўлларидан 1998 йилда содир бўлган бахтсиз ҳодиса оқибатида айрилган. Эркак юқори волтли электр узатиш линиясида ишлаётганида 11 минг волтли кучланиш унинг иккала қўлини ҳам куйдириб юборган.
«Гретаррсон кўплаб жароҳатлар олган ва уч ой комада ётган, жарроҳлар унинг иккала қўлини ҳам кесиб ташлашга мажбур бўлган, шунингдек, у яна бир нечта операцияни бошидан ўтказган, жумладан, эркакка буйрак кўчириб ўтказилган», — дейилади хабарда.
Гретарссонга донорлар бир неча йил давомида қидирилган бўлиб, операцияга тайёргарлик кўриш учун жами 50 нафар тиббиёт ходими жалб этилган. Трансплантация вақтида тўртта жарроҳлар бригадаси иш олиб борган.
Ҳозирда эркак операциядан сўнг Лиондаги клиникаларнинг бирида соғлиғини қайта тикламоқда. Шифокорлар Гретарссоннинг қўллари қанчалик ҳаракатлана олишини прогноз қилишдан бош тортмоқда. Жарроҳ Арам Газаряннинг сўзларига кўра, бемор тирсагини бука олса, бу унинг ҳаётини ўзгартириб юборади.
Аввалроқ Хитойда юраги уч кун давомида урмаган қиз омон қолгани тўғрисида хабар берилганди.
Изоҳ (0)