«Ўзметкомбинат»га янги бошқарув раиси тайинланди

«Ўзбекистон металлургия комбинати» АЖга янги бошқарув раиси тайинланди. Бу ҳақда комбинат матбуот хизмати хабар берди.

Қайд этилишича, 20 январь куни «Ўзбекистон металлургия комбинати» акциядорлик жамияти кузатув кенгаши ҳамда комбинат раҳбариятининг кенгайтирилган таркибдаги йиғилиш ўтказилди. Унда бош вазир Абдулла Арипов ҳам иштирок этди.

Йиғилишда ташкилий масала кўрилган. «Ўзметкомбинат» АЖ кузатув кенгаши кўп йиллар давомида жамиятда фаолият юритиб келган Рашид Пирматовни акциядорлик жамиятининг бошқарув раиси лавозимига тасдиқланган.

Рашид Пирматов Тошкент вилоятининг Бекобод туманида туғилган. 1986 йилда Москва пўлат ва қотишмалар институтининг муҳандис-металлург мутахассислигини тамомлаган. Бекободга қайтганидан сўнг «Ўзметкомбинат»да турли лавозимларда фаолият юритган. Унинг бутун меҳнат фаолияти комбинат билан боғлиқ. У техника фанлари номзоди, Ўзбекистонда хизмат кўрсатган саноат ходими.

Шунингдек, комбинат бошқарув раисининг биринчи ўринбосари этиб Дилшод Аҳмедов тайинланган.

«Ўзметкомбинат» АЖ раҳбариятининг кенгайтирилган йиғилишида амалга оширилаётган инвестиция лойиҳаларининг бориши, мамлакатнинг етакчи қора металлургия корхонасини ривожлантиришнинг истиқболлари ҳам кўриб чиқилган.

Эслатиб ўтамиз, «Ўзметкомбинат»нинг аввалги бошқаруви раиси Сергей Вюненко 2020 йилнинг сентябрь ойида  42 ёшда коронавирус асорати оқибатида вафот этганди.