Японияда ретро услубида яратилган электромобил Nexia-3 нархида сотувга чиқди (фото)

Япониядаги Blaze фирмаси ташқи кўриниши билан ўтган аср машиналарига ўхшаш EV Classic автомобилини намойиш этди, деб хабар беради Motor. Электромоторга эга митти модель нархи 880 минг иена (8,4 минг доллар) бўлиб, бу пулга янги Nexia-3 харид қилиш мумкин.

Бир ўриндиқли электрокар оғирлиги 200 килограммни ташкил этади: узунлиги 2330 миллиметр, эни — 1170 миллиметр, баландлиги — 1160 миллиметр.

Blaze дизайнерлари максимал даражада эски автомобилларга ўхшашликни яратишга уринган: EV Classic узун капот, симли кегайларга эга нисбатан йирик ғилдирак ва ёруғлик диодли доирасимон фараларга эга бўлган. Шунингдек, жамланмадан замонавий тормозлар ўрин олган.

Электрокар тўртта от кучи ва 28 Нм айланувчи моментга эга мотор ёрдамида ҳаракатга келади. EV Classic’нинг максимал тезлиги соатига 50 километрни ташкил этади, 20 килограммли аккумулятор эса бир марта қувватланиш орқали 50 километр масофа босишни таъминлайди. Нолдан 100 фоизгача қувватлантириш учун саккиз соат керак бўлади.

Электромобил тўрт хил рангда тақдим этилади: кумушранг, қора, тўқ яшил ва қизил. Қўшимча тўлов эвазига махсус ғилоф, қўшимча аккумулятор, ўзгарувчан ток учун адаптер каби аксессуарларни ҳам харид қилиш мумкин. EV Classic’ни фақат Японияда буюртма қилса бўлади.

Аввалроқ «КамАЗ» ўзининг биринчи электромобили — «Кама-1»ни тақдим этгани, «Ока»га ўхшаш модель Tesla’дан уч баробар арзон бўлиши тўғрисида хабар берилганди.