АҚШ Федерал қидирув бюроси янги сайланган президент Жо Байденнинг 20 январга белгиланган инаугурацияси билан боғлиқ интернетда кўп сонли таҳдидларни қайд этмоқда. Бу ҳақда идора раҳбари Кристофер Рэй брифингда маълум қилди, деб ёзади «РБК».
«Айни пайтда биз потенциал қуролли норозилик акцияларига даъватларни кузатяпмиз», — деди у. Рэйнинг сўзларига кўра, у «потенциал» сўзини ишлатишига сабаб шуки, бу акцияларнинг қайси бири ҳақиқатан ҳам режалаштирилганини тушуниш қийин.
«Биз Колумбия округида, шунингдек, бутун мамлакат бўйлаб штатлар Капитолий бинолари ёнида яқин кунларда ўтказилиши режалаштирилган норозилик акциялари ва митингларнинг кўпчилигида зўравонлик юзага келиши мумкинлигидан хавотирдамиз», — дея аниқлик киритди ФҚБ директори.
Рэйнинг айтишича, 6 январь куни Капитолий биносига уюштирилган ҳужум муносабати билан ҳуқуқ-тартибот органлари ходимлари 100 дан ортиқ кишини қўлга олган. «Биз 200 дан зиёд одам (тартибсизликлар иштирокчилари)нинг шахсини аниқлаб бўлдик. Биз кимлигингизни биламиз. Агар сиз у ерга борсангиз, унда ФҚБ агентлари сизни топади», — дея огоҳлантирди у.
Аввалроқ АҚШ Федерал қидирув бюроси (ФҚБ) Американинг барча штатлари марказлари ва Вашингтонда 16—20 январь кунлари қуролли норозиликлар режалаштирилаётгани ҳақида огоҳлантирган эди.
Трамп эса Вашингтонда фавқулодда вазият режимини тасдиқлади ва сайланган президент Жо Байденнинг 20 январдаги инаугурацияси олдидан хавфсизликни таъминлаш учун қўшимча федерал кучларни йўналтиришни буюрди.
Кейинроқ конгресс вакиллари амалдаги АҚШ президенти Дональд Трампнинг бир неча минглаб тарафдорлари 20 январь, чоршанба куни сайланган давлат раҳбари Жо Байденнинг инаугурациясига халақит бериш учун Капитолийга шиддатли ҳужум уюштиришни режалаштираётгани ҳақида хабардор қилинди.
6 январь куни Вашингтондаги тўқнашувларда беш киши ҳалок бўлди. Сайлов якунларидан норозилик белгиси сифатида Капитолий биносига келишга Трамп даъват қилган эди, шундан кейин АҚШ конгресси вакиллар палатасига импичмент тўғрисидаги резолюция киритилди.
Изоҳ (0)