Тошкентда очилган очиқ осмон остидаги муз майдонини ташкил этиш учун давлат бюджетидан пул сарфланмаган. Бу ҳақда Ўзбекистон бош вазири ўринбосари — Туризмни ривожлантириш давлат қўмитаси раиси Азиз Абдуҳакимов «Дарё» мухбири Миролим Исажоновга берган қисқа интервьюсида айтиб ўтди.
7 январь куни Алишер Навоий номидаги давлат академик катта театри олдида муз майдони очилди. У «аҳоли орасида соғлом турмуш тарзи ҳамда спортни кенг тарғиб қилиш» мақсадида ташкил этилган. Муз майдони бир ой муддатга ўрнатилган бўлиб, бу вақт мобайнида Dance Music Fest Winter, Iosis Fest, Tashkent Rap Festival каби мусиқа фестиваллари, хоккей бўйича ўсмирлар чемпионати, муз устида рақс шоуси каби тадбирлар ўтказилиши режалаштирилган.
Очилиш маросимида Россия муз спорти юлдузи, фигурали учиш бўйича олимпия чемпиони Алексей Ягудин чиқиш қилган.Мазкур лойиҳа учун тегишли ускуналар Россиядан ижарага олиб келинди. Барча ташкилий масалалар — мутахассисларни олиб келиш, транспорт харажатлари, турли махсус кимёвий моддалар ва уларни сақлаш, машҳур фигурист Алексей Ягудиннинг гонорари, электр энергия ҳаражатларини қўшиб ҳисоблаганда, жами маблағ тахминан 800-900 миллион сўмга тўғри келмоқда. Буларни ўзимизнинг тарғибот-ташвиқот ишларимиз доирасида ташкил этяпмиз. Бу борада бизнинг ҳамкорларимиз бор ва улар ҳам ўзларининг маблағларини киритишган. Бунинг учун бюджетдан умуман пул сарфламадик. Фақатгина тегишли инфраструктурани яратиш, техникаларни Россиядан ижарага олиб келиш жараёнида божхонадан қисқа вақт ичида ўтишига ёрдам бердик. Кўриб турибсизки, бу ўзини оқлайдиган яхши бир лойиҳага айланди.Аввалроқ 2022 йилда Ўзбекистоннинг бошқа йирик шаҳарларида ҳам очиқ осмон остидаги муз майдонлари ташкил этилиши мумкинлиги маълум қилинган эди.Кейинги йилда тадбиркорлар ва ташаббускорлар мана шундай таклиф билан чиқадиган бўлса, бу йўналишда уларга, албатта, ёрдам берамиз. Энг муҳими, биз бундай тадбирларни бюджет маблағларини сарфламаган ҳолда ташкил этишни кўпроқ ўйлаяпмиз. Пандемия одамларга ўз таъсирини ўтказмоқда. Бюджет маблағларини биринчи навбатда соғлиқни сақлаш соҳасига йўналтиришимиз керак. Умуман олганда, ҳаёт давом этади, одамларимизга мана шундай янгиликларни таклиф этишимиз керак, аҳолининг кайфиятини кўтаришимиз лозим. Агар ташаббускорлар пайдо бўлса, биз шундай лойиҳаларни қўллаб-қувватлаймиз.
Азиз Абдуҳакимов, Ўзбекистон бош вазири ўринбосари
Изоҳ (0)