«Бунинг нимасидан қўрқиш керак?». Ўзбекистон ҳукумати аъзолари даромадларни декларация қилиш тўғрисидаги қонун лойиҳасига ижобий муносабатда

Коррупцияга қарши курашиш агентлиги амалдорларнинг даромадлари декларация қилинишини назарда тутувчи қонун лойиҳасини ишлаб чиқди. 2019 йилда Бандлик ва меҳнат муносабатлари ишлаб чиққан қонун лойиҳасидан фарқли ўлароқ (вазирлик лойиҳаси бўйича, ушбу тартиб 2020 йил 1 январдан жорий этилиши керак эди), агентлик таклиф қилаётан лойиҳада қуйидан тортиб юқоригача бўлган барча мансабдорлар — ҳатто президент ва бош вазир ҳам декларация тўлдириши таклиф қилинган. Ҳужжат лойиҳаси ижтимоий тармоқларда қизғин муҳокама қилинмоқда.

«Дарё» мухбири Миролим Исажонов ҳукуматнинг бир қатор аъзоларига мурожаат қилиб, уларнинг ушбу қонун лойиҳасига муносабати билан қизиқди.

«Турмуш тарзим олаётган ойлигимга шаклланмаган» — Озодбек Назарбеков, маданият вазири

«Бу, эҳтимол, олий ўқув юртини битириб, давлат муассасаларида ишлаб-ишлаб, раҳбар даражасига келган ходимларни безовта қилар. Лекин халқимиз ҳам яхши билади, давлат идорасида фаолиятимни бошламасимдан аввал бизнес тармоқларимни йўлга қўйганман. Айтмоқчиманки, менинг турмуш тарзим олаётган ойлигимга шаклланмаган. Шунинг учун бу қонун лойиҳаси шахсан мени безовта қилмайди. Ушбу янги тартиб мен учун жуда тўғри иш бўлади. Чунки бу ҳам қайсидир маънода коррупциянинг олдини олувчи муҳим омилллардан бири бўлиши шубҳасиз».

«Бундан нимага қўрқиш керак?!» — Шуҳрат Содиқов, ахборот технологиялари ва коммуникацияларини ривожлантириш вазири

«Мен нимадан хавотирланишим керак?! Балки бор нарсани кўрсата билишимиз лозим. Декларация қилиш масаласи иқтисодиёти ривожланган давлатларда устун қонун ҳужжатларидан бири ҳисобланади. Бундан нимага қўрқишимиз керак?! Буни қўллаб-қувватлашимиз лозим».

«Қаршилигим йўқ, лекин бирдан ҳамманинг даромадини декларация қилиш қийин бўлса керак» — Иброҳим Абдураҳмонов, инновацион ривожланиш вазири

«Ушбу қонун лойиҳасига муносабатим ижобий. Охирги тўрт йилда, умуман, Янги Ўзбекистонда энг катта масала эркинлик, очиқлик сиёсати бўляпти. Бу эса жамиятни ривожлантиришга олиб келмоқда. Давлат амалдорларининг ҳам даромади очиқланса, бу жамиятни янада ривожлантирадиган омил бўлади. Ўзим чет элда ўқиб, яшаган пайтларимда бундай жараёнларни кўрганман. Бу дунё тажрибасида бор.

Бу ўзимизда албатта, босқичма-босқич амалга оширилиши лозим. Бирданига ҳамманинг даромадини декларация қилиш қийин бўлса керак, деб ўйлайман. Айни пайтда давлатимизда рақамлаштириш жараёни кетяпти-ку, хоҳлаймизми, йўқми, ўз-ўзидан ҳеч ким ҳеч нарсани яшира олмайдиган даражага келади. Барибир замонга мослашамиз. Ҳам вазир, ҳам фуқаро сифатида мазкур қонун лойиҳасига ижобий қарайман, қаршилигим йўқ».

«Беркитадиган нарсамиз йўқ» — Равшан Эрматов, Жисмоний тарбия ва спорт вазирининг биринчи ўринбосари, Ўзбекистон футбол ассоциацияси биринчи вице-президенти

«Бундан нега хавотирланишим керак?! Бу лойиҳага, албатта, тайёрмиз. Ўзбекистонда қандай қонуний жараён бўлаётган бўлса, уларнинг ҳаммасига тайёрмиз ва очиқмиз, беркитадиган нарсамиз йўқ. Янги қонун лойиҳасини ижобий қабул қиламан».