Porsche Taycan ноқонуний Cannonball Run пойгасида янги рекордни ўрнатишга муваффақ бўлди. InsideEV нашри журналисти Кайл Коннер икки нафар дўсти билан электрокар ёрдамида бутун АҚШ ҳудудини 44 соат 25 дақиқа ва 59 сонияда босиб ўтди. Электрокарлар орасидаги бундан олдинги рекорд Tesla Model 3’га тегишли эди, деб ёзади Motor.
Нашрнинг таъкидлашича, бу иккита электрокар орасидаги тезлик бўйича ҳақиқий пойга эмас, балки қувватлантириш станциялари ўртасидаги жангга айланган. Журналистлар Нью-Йоркдан Лос-Анжелесгача саёҳат қилиш учун 2020 йилда ишлаб чиқарилган энг катта батарея сиғимига, аэродинамик ғилдирак дискалари ва ўриндиқларда массаж функциясига эга Porsche Taycan 4S’дан фойдаланган.
Бу каби Taycan бир марта қувватланиш орқали 460 километр йўл боса олади, босиб ўтилган масофа эса 4,5 минг километрни ташкил этади. Журналистлар қувватлантириш станцияларга боғлиқ ҳолда минимал даражада тўхташларни ҳисобга олиб, маршрутни пухта режалаштирган. Натижада пойга Elektrify America ва Supercharger — Tesla қувватлантиргичлари ўртасидаги беллашувга айланиб кетган.
Шунингдек, энг юқори қуввати 270 киловаттга тенг Taycan батареяси ҳам синовдан ўтган. Бироқ Коннер бирор марта ҳам бу каби кўрсаткичга эриша олмаган: аксарият ҳолларда у 250 киловаттни, фақат бир маротаба 260 киловаттни ташкил этган. Пойга иштирокчилари буни дастурий таъминотдаги носозликлар билан изоҳлаган.
Cannonball Run’нинг бундан олдинги рекорди Tesla Model 3’га тегишли бўлиб, у 2019 йилнинг августида ўрнатилган — 45 соату 16 дақиқа.
Эслатиб ўтамиз, 2020 йилнинг августида америкалик Даг Таббатт, Арне Томан ва Беркли Чедвик АҚШнинг бир чеккасидан иккинчисига 25 соат 39 дақиқада етиб борган эди. Улар Audi А6 ёрдамида ўтган йилги ноқонуний Cannonball Run пойгасидаги рекордни қайтаришга муваффақ бўлган.
Изоҳ (0)