Ливан ва Шотландияда яна карантин жорий этилди

Ливан ҳукумати коронавирус билан касалланиш даражаси ошгани сабабли карантин режимини жорий этишга қарор қилди, деб хабар бермоқда «Коммерсантъ».

Чекловлар 7 январдан 1 февралгача амал қилади. Шунингдек, мамлакатда соат 18:00 дан 05:00 гача комендантлик соати жорий этилади.

Ливандаги карантин доирасида савдо марказлари, кафе ва ресторанлар, спорт заллари, музейлар ва кинотеатрлар ёпилади. Барча мактаб ўқувчилари ва талабалар масофавий таълимга ўтказилмоқда. Ҳукумат, шунингдек, санитария-эпидемиология меъёрларига риоя этилиши устидан назоратни кучайтиради.

Ливан соғлиқни сақлаш вазири вазифасини бажарувчи Ҳамад Хасаннинг айтишича, чекловларнинг кучайишига байрамдан кейин тиббиёт муассасаларида юзага келган кескин вазият сабаб бўлган. «Биз фавқулодда чоралар кўришга мажбур бўляпмиз, чунки интенсив терапия бўлимлари касалланганлар билан ҳаддан ортиқ тўлиб кетган», — деган у.

Ливанда 192 мингдан ортиқ киши коронавирус билан касалланган, уларнинг 1,5 мингдан ортиғи вафот этган. Ливанда бундан аввал ҳам карантин жорий этилган, у 14 ноябрдан 30 ноябргача давом этганди.

Шотландияда ҳам коронавирус билан касалланганлар сони кўпайгани сабабли 5 январдан бошлаб тўлиқ карантин жорий этилди. Мамлакатда болалар боғчалари ва мактаблари ёпилмоқда, чет элга чиқиш тақиқланган. Одамлар уйдан фақат озиқ-овқат маҳсулотлари, шунингдек ҳаётий зарурат бўлган тақдирда чиқишлари мумкин. Чеклов чоралари январь охиригача давом этади.

Шотландиянинг биринчи вазири Никола Стерженнинг айтишича, ҳукумат COVID-19 билан боғлиқ вазиятни «ўта жиддий» деб ҳисоблайди. Мамлакатда касалланганлар сонини ортиб бориши асосан Британияда тарқалишни бошлаган коронавируснинг янги тури билан боғлиқлигини таъкидлаган.

«Вируснинг тез тарқаладиган янги тури касалланиш даражасининг сезиларли ортишига олиб келди. Бизда вакциналар бор ва бизнинг вазифамиз — уларни иложи борича тезроқ тарқатиш. Бунинг учун ҳукумат сифатида қўлган келган ҳамма нарсани қиламиз», — деган Стержен.

Аввал хабар берилганидек, коронавируснинг «британча» штамми одатдагидан 70 фоизга тез тарқалмоқда. 20 дан ортиқ давлатлар, шу жумладан Ўзбекистон ҳам Буюк Британия билан авиапарвозларни тўхтатиб қўйди. Британия ҳукумати ҳам мамлакатда чекловларни кучайтирмоқда.