Интернетда рақсга тушаётган Boston Dynamics роботлари кенг муҳокамаларга сабаб бўлди (видео)

Интернетда Boston Dynamics’нинг эски хит қўшиққа рақсга тушаётган тўртта роботи кенг муҳокамаларга сабаб бўлди, деб ёзади «Hi-Tech.Mail.ru».

Boston Dynamics роботларини кўпчилик турли ёқимсиз видеолар орқали эслайди — уларни таёқлар билан уришади, тепишади ва бирор иш қилишига халақит беришади. Албатта, бу орқали мутахассислар барқарорлаштирувчи тизим ва бошқа алгоритмларни синовдан ўтказади.

Компаниянинг навбатдаги видеосида роботлар устидан ҳеч ким кулмаган — улар шунчаки «Do You Love Me?» қўшиғига рақсга тушмоқда. Роликда битта эмас, бирданига тўртта робот рақсга тушаётганини ва ҳаракатларнинг аксар қисми синхрон эканлигини кўриш мумкин. Улар айрим одамларга қараганда яхшироқ рақсга тушган.

Boston Dynamics компанияси шу орқали барчани кириб келаётган Янги йил билан табриклашга қарор қилган.

Аввалроқ Hyundai роботлар ишлаб чиқарувчи Boston Dynamics’нинг асосий эгасига айлангани тўғрисида хабар берилганди.