Терига фойдалилик жиҳатидан ҳеч бир зиравор зарчаванинг олдига туша олмайди. Аксари одамлар карри ва зарчавани бир зиравор деб ўйлайди, аммо уларнинг ҳар иккиси алоҳида. Зарчаванинг қуруқ кукунинг ҳиди ўткир, мазаси ифодалаб бўлмайдиган бўлади. Қадимги Ҳиндистонда унинг фойдалилик хусусиятларини сақлаб қолиш ва мазаси яхшироқ бўлиш учун карри аралашмаси ўйлаб топилган. Ушбу аралашма зарчава, кориандр, мурчнинг бир неча тури ва бошқа зираворлар қўшиб тайёрланади. Ушбу маҳсулот таомларга ўзига хос таъм бахш қилиш билан бирга тиббиётда ҳам самара беради.
Антиоксидантлик хусусияти бор
Атроф-муҳитдаги чанглар, сигарет тутуни, ультрабинафша нурлари сабаб терининг эрта қариши кузатилади. Тадқиқотларда аниқланишича, зарчава таркибидаги куркумин моддаси терига бундай зарарлаш хусусиятига эга бўлган радикалларга қарши курашишда самара беради. Бу эса намликни тикланиши ҳамда ажинлар камайишига ҳисса қўшади.
Яллиғланишга қарши восита сифатида
Бир қарашда кўзга кўринмайдиган организмдаги яллиғланиш жараёнлари ҳуснбузар тошиши, псориаз, атеросклероз, вазн тўплаш сингари саломатлик билан боғлиқ муаммоларга олиб келиши мумкин. Куркуминнинг яллиғланишга қарши хусусияти эса деярли барча ҳужайраларда бўладиган ва яллиғланишга жавоб берадиган аниқ оқсилли комплексни блоклаши билан намоён бўлади.
Вазн ташлашга ёрдам беради
Куркуминнинг қонни тозалаш хусусияти ҳам мавжуд. Организмда узоқ вақт давомида токсинларнинг тўпланиши тери билан боғлиқ муаммо келиб чиқишида муҳим рол ўйнайди. Олимлар эса зарчаванинг ҳақиқатдан ҳам токсинлардан тозаланишга ёрдам беришини аниқлаган. Ушбу маҳсулот токсинларнинг биокимёвий йўқотилишига жавоб берадиган муайян ферментлар миқдорини оширади. Шунингдек, сафрога ҳам таъсир қилади ва унинг кўпроқ ажралгани ҳисобига овқат тез ҳазм бўлади ва қондаги ёғда эрийдиган токсинлар йўқолиб, жигар фаолиятида ҳам ижобий ўзгариш сезилади.
Қон айланишини яхшилайди
Қоннинг яхши айланиши озиқа моддаларининг керакли жойини топиши, ҳужайралардан токсинларнинг тозаланишига сабаб бўлади. Куркумин антитромбоз таъсир қилгани сабаб, бу борада самара бера олади. Клиник тажрибаларда унинг қон-томир ва тери капилярларида микроциркуляцияни яхшилаши аниқланган. Эндотелийнинг фаолиятида муаммо бор бўладиган бўлса, организм қон босими ва қон ивишини тўғри бошқара олмаслиги мумкин. Шунингдек, ушбу маҳсулотнинг «ёмон» холестеринни камайтириши ҳақидаги маълумотлар ҳам йўқ эмас. Унинг юрак қон-томир касалликларини олдини олиши доимий равишда фитнес билан шуғулланишга тенглаштирилади.
Коллаген синтезини оширади
Коллаген терининг ёш, таранг ва эластик бўлишида, регенерация жараёни ҳамда янгиланишида асосий роллардан бирини ўйнайдиган муҳим оқсил саналади. Куркумин ҳужайра фаоллигини таъминлаб, коллаген синтезини оширади.
Максимал даражада фойдали бўлиш учун уни таом, чой, шўрва, салатларга қўшиб истеъмол қилиш тавсия қилинади. Американинг Origins косметик бренди билан ҳамкорлик қиладиган шифокор Эндрю Вайлнинг маълум қилишича, энг узоқ умр кўриши билан маълум бўлган Окинава оролидаги одамлар ҳар куни зарчавали чой ичади. Бундай чой тайёрлаш учун 4 стакан сувга 1 чой қошиқ майдаланган зарчавани қўшиб 10 дақиқа паст оловда қайнатиш, занжабил ва асал қўшиш кифоя. Қолаверса, ундан юз учун ниқоб тайёрлашда ҳам фойдаланса бўлади.
Изоҳ (0)