Бухорода ўтган Халқ депутатлари вилоят кенгашининг навбатдаги сессиясида ҳоким вазифасини бажарувчи Ботир Зариповнинг 2020 йилда амалга оширилган ишлар ва 2021 йилдаги режалар ҳақидаги ҳисоботи тингланди, дея хабар берди «Дарё» мухбири.
Ботир Зарипов 2020 йилнинг ўтган даврида вилоятда йўл қўйилган камчиликлар хусусида тўхталар экан, «Замон шиддат билан ўзгариб, вақтнинг қадри ортиб боряпти. 2021 йилги режаларимизнинг кўлами ўтаётган ҳар бир кун, соат ва дақиқалардан унумли фойдаланишни тақозо қилади. Айни талабни ҳисобга олиб, бугун долзарб вазифалар ижросига киришганмиз. Лекин бундай мақсадларга қуруқ ва баландпарвоз гаплар, шунчаки ваъдалар билан эришиб бўлмайди», деди.
Таъкидланишича, вилоятда ялпи ҳудудий маҳсулот ҳажми 30 триллион 300 миллиард сўмга етиб, аҳоли жон бошига 15 миллион 600 минг сўмни ташкил қилган. Бюджетнинг даромад қисми белгиланган 1 триллион 736 миллиард сўм ўрнига, 1 триллион 949 миллиард сўмни кўрсатиши кутилмоқда. Шунингдек, вилоят маҳаллий бюджет даромадлари бўйича йиллик белгиланган 1 триллион 508 миллиард сўмлик режа, амалда 1 триллион 678 миллиард сўмга ёки 170 миллиард сўмга кўп бажарилиши режалаштирилган.
«Бу — албатта, ютуқли жиҳатлар. Бироқ вилоят маҳаллий бюджетидан 182 та оилавий мактабгача таълим ташкилоти ўз фаолиятини бошлаши учун 2,7 миллиард сўм, 2019 йилги ‘Обод қишлоқ’ ва ‘Обод маҳалла’ дастурлари асосида 6 та 1410 ўринли давлат мактабгача таълим ташкилотларини жиҳозлаш учун 1,5 миллиард сўм маблағ ажратилмаган. Мактабгача таълим вазирлиги ва ташаббускорлар томонидан 23 та мактабгача таълим ташкилотини ташкил этиш учун битим имзоланган. Афсуски, имтиёзли кредит маблағларини ажратиш муаммо бўлиб қолган. Давлат тасарруфида бўлган 54 та мактабгача таълим ташкилоти бугунги кунда ҳам буржуйка печлар билан иситилаётгани ачинарли. Аччиқ бўлса-да, боғчаларнинг 138 тасининг ошхонаси талаб даражасида жиҳозланмаганини ҳам таъкидлаш ўринли», — деди сессия давомида вилоят раҳбари.
Билдирилишича, Бухородаги 536 та мактабнинг 158 таси таъмирталаб ҳолатга келиб қолган, 84 тасида спорт зали мавжуд эмас. 114 та мактабдаги ҳожатхоналарнинг 76 таси қайта қуришга, 169 таси эса таъмирлашга муҳтож. Мактаблардаги 1267 дона компьютер техникаси маънан эскирган, 291 та лаборатория жиҳозлари бугунги кун талабларига жавоб бермайди, мактабларда 26 815 дона ўқув парталари ҳамда 2336 дона синф доскаларига эҳтиёж мавжуд.
«Жорий йилнинг 1 декабрь ҳолатида фақатгина 19 та мактаб, 51 та мактабгача таълим масканларида реконструкция ва мукаммал таъмирлаш ишлари амалга оширилган. Умумтаълим мактабларида замонавий энерго-тежамкор 246 та қозонхона ўрнатилиб, иссиқлик тизимини таъмирлаш ишларига маҳаллий бюджет маблағлари ҳисобидан 10 миллиард сўм маблағ ажратилди. 100 га яқин умумтаълим мактабларидаги мавжуд яроқсиз буржуйка печлари тўлиқ алмаштирилди. Бундан кейин таълим соҳаси харажатларига бюджет даромадларининг 11 фоизи ажратилади, мактабгача таълим ташкилотларини сақлашга 88 миллиард сўм ва халқ таълими муассасаларида қулай шароитлар яратиш тадбирларига 211 миллиард сўм сарфланади», — дея таъкидлади вилоят раҳбари Ботир Зарипов.
Сессияда таъкидланишича, Бухородаги 53 та тиббиёт муассасаси, 24 та ирригация ва мелиорация, 115 та автомобиль ва ички йўллари ҳамда 5 та бошқа объект янгидан қурилади. Йил якунига қадар эса 8 та ижтимоий соҳа объектида реконструкция ва мукаммал таъмирлаш ишлари тўлиқ бажарилади. Айтилишича, мазкур ижтимоий соҳа муассасаларида қурилиш-таъмирлаш ишларини амалга ошириш учун 35 миллиард сўм сарфланади.
Бухоро ҳокими вилоятда ички йўлларни таъмирлаш ва тартибга келтириш, канализация тизимларини тўлиқ янгилаш, мавжуд маданият ва истироҳат боғларига замонавий қиёфа бериш, ишсизликнинг олдини олиш мақсадида вилоятда заводлар фаолиятини йўлга қўйиш, саноат зоналарини яратиш, туризмни янада ривожлантириш, қишлоқ хўжалиги соҳасида ишлаб чиқаришни мукаммаллаштириш каби иқтисодий масалалар хусусида ҳам фикр-мулоҳазаларини билдирган.
Изоҳ (0)