Лувр аукцион орқали «Мона Лиза» билан ҳимоя шишасисиз «учрашув»ни сотди

Париждаги Лувр музейи аукцион орқали Леонардо да Винчининг «Мона Лиза» картинасини ҳимоя шишасисиз томоша қилиш имкониятини сотди. 80 минг евро эвазига савдолар ғолиби картинани ҳар йили текширувдан ўтказадиган мутахассислар қаторига қўшилиши мумкин, деб хабар беради «Korrespondent.net».

Таъкидланишича, ноодатий аукцион молиявий инқироз сабаб амалга оширилган, чунки коронавирус пандемияси дунёги энг кўп ташриф буюрувчига эга музейга ҳам таъсир кўрсатган.

«Мона Лиза» билан «учрашув»дан ташқари аукцион орқали директор музейи билан экскурсия ва бўм-бўш Луврни кечаси айланиш имконияти ҳам сотилган. Лотларнинг ҳар бири 38 минг евродан сотилгани айтилмоқда.

Савдолар «Bid for the Louvre» шиори остида Друо ва Кристис аукцион уйлари билан ҳамкорликда ўтказилган. Олинган фойданинг барчаси хайрия ва музейнинг педагогик лойиҳалари учун йўналтирилади.

Карантин сабаб музей, тахминан, 90 миллион евродан айрилган. Ҳар йили унга 10 миллионга яқин одам ташриф буюриб келади.

Аввалроқ франциялик бизнесмен мамлакатни инқироздан қутқаришнинг оддий йўлини топгани, бунинг учун «Мона Лиза»ни сотиш кераклигини айтганди.