«Зальцбург» ярим ҳимоячиси Доминик Собослаи фаолиятини «Лейпциг» жамоасида давом эттиради.
Немис клуби матбуот хизматининг маълум қилишича, 20 ёшли футболчи «Лейпциг» билан 2025 йилнинг ёзига қадар мўлжалланган шартнома имзолаган. У янги жамоасида 17-рақам остида ҳаракат қилади.
Аввалроқ трансфер 25 миллион еврога баҳоланиши айтилганди. Венгриялик футболчига «Реал» ва «Арсенал»дан ҳам қизиқиш бор эди. Ҳатто мадридликлар устози Зинедин Зиданнинг шахсан ўзи Собослаини «Реал»га таклиф қилгани ҳақида хабарлар тарқалганди.
Собослаи «Зальцбург»дан «Лейпциг»га ўтган еттинчи футболчига айланди. Унга қадар Даё Упамекано, Ҳван Ҳи Чан, Петер Гулачи, Конрад Лаймер, Амаду Айдара, Марсель Забитцер каби футболчилар шу йўналишда «Лейпциг»га йўл олганди. Маълумот учун, ҳар икки клуб ҳам Red Bull компаниясига тегишли ҳисобланади.
Венгрия терма жамоаси вакили 2020/21 йилги мавсумда Австрия чемпионатида 11 ўйин ўтказиб, 4 гол ва олтита голли узатма муаллифига айланди.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)