Хоразмнинг марраси баланд бўлиши керак. Бу ҳақда Президент Шавкат Мирзиёев 13 декабрь, якшанба куни Хоразм вилояти фаоллари билан бўлиб ўтган йиғилишда таъкидлаб ўтди.
Йиғилишда долзарб ижтимоий-иқтисодий масалалар муҳокама қилинди. Ҳар бир шаҳар ва туман, маҳаллаларда мавжуд имкониятлардан келиб чиқиб, «ўсиш нуқталари» белгиланди.
Хусусан, Урганч шаҳрида тўқимачилик ва туризм, Хива шаҳрида туризм ва қурилиш материаллари, Гурлан туманида тўқимачилик ва иссиқхона хўжалиги, Янгибозор туманида иссиқхона ва мева-сабзавотни қайта ишлаш, Тупроққалъа туманида машинасозлик ва электр техникаси каби йўналишларни ривожлантириш мумкинлиги қайд этилди.
Шу йўналишларда ишлаб чиқилган лойиҳаларни амалга ошириш учун ҳар бир ҳудудга вазирлик ва банклар раҳбарлари бириктирилди. Барча лойиҳалар 16 мингдан зиёд иш ўрни ташкил этиш имконини беради.
2021 йилда вилоятда оилавий тадбиркорликни ривожлантириш, ёшлар ва аёллар бандлигини ошириш мақсадларига 500 миллиард сўм кредит ресурси ажратилиши маълум қилинди.
Хоразм учун драйвер соҳалардан бири туризм бўлгани учун вилоятда меҳмонхона ўринларини кўпайтириш, салоҳиятли мамлакатлардан Урганчга доимий ва чартер рейслар ташкил этиш зарурлиги таъкидланди.
Ички туризмни ривожлантириш учун транспорт хизматларини яхшилаш, хусусан, Фарғона водийсидан авиа ва темир йўл қатновини йўлга қўйиб, бунинг дастлабки даврида 30 фоизлик чегирма қўллаш бўйича кўрсатма берилди. Кейинчалик бу тажриба Термиз, Самарқанд ва Бухоро шаҳарлари бўйича ҳам қўлланилади.
«Қийин даврда, мураккаб шароитда яшаяпмиз. Ана шу шароитда ҳар бир туман, ҳар бир маҳалланинг ўз ўрни, марралари бор. Хоразмнинг марраси баланд бўлиши керак», — деган давлат раҳбари.
Аввалроқ Хоразмдаги фаоллар йиғилиши давомида Президент «маҳалла раиси — ислоҳотчи» тамойили асосида ижтимоий муаммоларни ҳал қилиш бўйича янги тизим жорий этилишини эълон қилгани ҳақида хабар берилган эди.
Шавкат Мирзиёев 12 декабрдан буён Хоразм вилоятида ташриф билан бўлиб турибди. Қайд этиш жоиз, давлат раҳбари 2020 йил март ойида ҳам вилоятда бўлиб, ҳудуддаги янги тўқимачилик корхонаси, «Ҳазорасп» эркин иқтисодий зонаси, Янгиариқ туманидаги замонавий иссиқхона, Ичанқалъада амалга ошириладиган туризм лойиҳалари, Президент мактаби, Жалолиддин Мангуберди мемориал боғи билан танишган, фаоллар йиғилишида қатнашган эди.
Изоҳ (0)