Соф маҳсулотдан тайёрланган шарбатларнинг афзаллиги барчага маълум. Бу организмнинг яхши ишлаши учун зарур бўлган энергия, витамин ва минералларнинг манбайи ҳисобланади. Улар ичак микрофлорасини яхшилаш, модда алмашинуви жараёнини тезлаштириш ва иммунитетни мустаҳкамлаш учун жуда фойдали. Қуйида мавсумий мева ва сабзавотлардан тайёрланадиган 5 та фойдали шарбат рецепти билан танишиш мумкин.
Занжабил ва цитрус
Занжабил ва цитрус C витаминининг ажойиб манбайи бўлиб, вазн йўқотишда жуда катта ёрдам беради. Бир чой қошиқ майдаланган занжабил илдизи, иккита тозаланган апельсин, грейпфрут ва яримта лимоннинг барчаси шарбат чиқаргичга солинади. Олинган шарбат сув билан суюлтирилади. Шунда унинг концентрацияси камроқ бўлади, бу эса тана учун фойдалидир.
Лавлаги
Лавлаги шарбати энг фойдали ичимликлардан бири ҳисобланади. У жигар, буйрак, ўт ва сийдик пуфаги, лимфа тугунлари билан боғлиқ касалликларни даволаш ва олдини олиш учун ишлатилади. Шунингдек, иммунитет тизимини ҳам яхшилайди. Айниқса, тери ҳолатига ижобий таъсир этиши билан жуда фойдали. Лавлаги шарбати инсоннинг ҳолати ва рангини тетиклаштириши учун хом лавлаги, сабзи ва олманинг биргаликда шарбати олинади ва ялпиз қўшиб, истеъмол қилинади.
Сабзи
Сабзи таркибида терининг янгиланиши жараёнида иштирок этадиган ва организмнинг соғлом ишлаши учун зарур бўлган B, C ва E витаминлари мавжуд. Сабзи шарбати учун 3—4 сабзи ва битта тозаланган апельсин шарбат чиқаргичга солинади ва тайёр бўлганидан сўнг бир неча томчи зайтун ёғи қўшилади.
Ошкўк (селдерей)
Ошкўк шарбати Голливуд актрисалари ва таниқли моделларининг энг севимли ичимлигига айланди. Кўпчилик ўйлаганидек мўъжиза бўлмаса-да, ошкўк шарбати танадаги токсинларни чиқариб ташлайди, терини ёшартиради ва қариш жараёнини секинлаштиради. Бунинг учун иккита ошкўк дастаси, битта олма, икки ош қошиқ лимон шарбати ва 1 чой қошиқ занжабил илдизи билан бирлаштирилиб, шарбат чиқаргичга солинади. Ҳосил бўлган шарбат ҳам саломатлик, ҳам тери парвариши учун истеъмол қилинади.
Карам
Карам шарбати энг ноодатий рецепт бўлиб, фойдаси ҳам ўзига яраша, албатта. Унга кўра, карам, олма ва сабзи шарбат чиқаргичдан ўтказилади ва сув билан суюлтирилиб, асал қўшилади. Йод, магний, фосфор, кальций, натрий, азот ва бошқа минерал моддалар ва организмдаги яллиғланишни бартараф этадиган витаминларга бой ушбу шарбатни бемалол қиш кунларида истеъмол қилиш мумкин.
Изоҳ (0)