Навоий вилоятининг Хатирчи туманида маҳаллий фермерлардан бири туман ҳокимининг унга берилган ер майдонига оид ижара шартномасини бекор қилиш ҳақидаги қарори устидан судга мурожаат қилган. Бироқ суд мажлиси белгиланган санага етмай фермернинг жасади туманнинг «Полвонота» МФЙ ҳудудидан ўтган ариқдан топилган, дея хабар қилмоқда «Xabar.uz».
Бош прокуратура матбуот хизмати фермернинг жасади 2020 йилнинг 5 ноябрь куни ариқдан (тан жароҳатларисиз) топилганини тасдиқлади. Шунингдек, ҳолат юзасидан терговга қадар текширув ҳаракатлари ўтказилиб, натижасига кўра, жиноят иши қўзғатишни рад қилиш тўғрисида қарор қабул қилинганини билдирди.
Суд-тиббий экспертизаси фермернинг ўлими юрак нафас йўлларининг сув билан беркилишидан келиб чиққан механик асфикциядан келиб чиққанлиги ҳақида хулоса берган.
Бош прокуратура матбуот хизмати раҳбарининг алоҳида қайд этишича, марҳумнинг қариндошларида турли шубҳалар туғилаётгани, уларнинг важларини тўлақонли текширилишини таъминлаш мақсадида жиноят иши қўзғатишни рад қилиш ҳақидаги қарор бекор қилинган. Ҳозирда қўшимча терговга қадар текширув ҳаракатлари ўтказилмоқда.
Аввалроқ Қорақалпоғистонда 79 ёшли аёл ва унинг набирасини ўлдирган шахс ҳибсга олингани, Андижонда маст фуқарони болта билан уриб ўлдирган шахс 17 ярим йилга қамалгани ҳамда Асакада эрини ўлдириш учун 50 минг долларга одам ёллаган аёл қайта қамоққа олингани ҳақида хабар берилганди.
Изоҳ (0)