Андижон вилоятида Иқтисодиёт ва қурилиш институти иш бошлади, дея хабар берди «Дарё» мухбири Умиджон Мамарасулов.
Маълум бўлишича, Андижон иқтисодиёт ва қурилиш институти Вазирлар Маҳкамасининг 2020 йил 26 августдаги қарорига асосан иқтисодиёт ва қурилиш соҳаси бўйича амалий кўникмаларга эга бўлган, рақобатбардош олий маълумотли мутахассислар ва илмий-педагогик кадрларни тайёрлаш, қайта тайёрлаш ва малакасини ошириш мақсадида ташкил этилган.
Институт ректори вазифасини бажарувчи Нозимжон Тўйчибоевнинг айтишича, қарорга асосан Андижон хизмат кўрсатиш ва сервис техникумининг бино ва иншоотлари институтга оператив бошқарув ҳуқуқи асосида берилган. Техникум биноси сентябрь ноябрь ойларида 2 миллиард 485 миллион сўм маблағ ҳисобидан қайта таъмирланиб жиҳозланган.
«Маблағ Олий ва ўрта махсус таълим вазирлигининг Олий таълим муассасаларини ривожлантириш маблағлари жамғармаси маблағлари ҳисобидан сарфланди», — дейди институт ректори вазифасини бажарувчи Нозимжон Тўйчибоев.
Маълумот берилишича, институтда 7 та йўналиш бўйича таълим берилади.
«Таълим муассасаларига ўқишга қабул қилиш бўйича давлат комиссияси мажлиси қарорига кўра, Фарғона водийсида яшовчи ва тестларда 56,7 ёки ундан юқори балл олган 375 нафар абитуриент контракт асосида Андижон иқтисодиёт ва қурилиш институтига ўқишга қабул қилиниши кўрсатилган. Ушбу қарор ижроси бўйича буйруқлар қабул қилинган. Шу кунга қадар 225 нафар талаба билан тузилган шартнома шартлари бажарилган. Улар 7 декабрдан бошлаб ўқув жараёнларида иштирок этмоқда. Талабаларга вилоятдаги ОТМлардан саралаб олинган 30 га яқин профессор-ўқитувчилар таълим бермоқда», — дейди Нозимжон Тўйчибоев.
Қўшимча қилинишича, 2021—2022 йилларда инвестиция дастурларига асосан институт учун 1200 ўринли ўқув биноси ва 400 ўринли талабалар турар жойини қуриш режалаштирилган.
Изоҳ (0)