Ижтимоий тармоқда 2020 йилнинг 8 декабрь куни «Жиззахда жарима майдонидан машиналарни олиб чиқиш учун навбат катта. Бунинг устига маъмурий амалиёт инспектори иш ўрнида эмас. Машиналарни ноқонуний равишда жарима майдонига қўйиш ҳолати ҳам кузатилмоқда» изоҳи келтирилган видеолавҳа тарқалди. Видео юзасидан ЙҲХББ ахборот хизмати маълумот берди.
Қайд этилишича, видеолавҳа ўрганилганда, ҳолат 8 декабрь куни Жиззах шаҳар ИИО ФМБ ЙҲХБ маъмурий амалиёт бўлимида тасвирга олинганлиги маълум бўлган.
«Ўзбекистон Конституцияси қабул қилинганлиги боис мамлакат миқёсида ходимлар учун 8 декабрь дам олиш куни ҳисобланади. Шу боис банк орқали жарималарни тўлаш имконияти бугун мавжуд эмас. Paynet тизими орқали тўловларни амалга ошириш имконияти мавжуд бўлиб, тизим орқали тўловларни амалга оширишда айрим қийинчиликлар (айрим фуқаролар тизимдан олдиндан фойдаланмаганликлари боис) юзага келмоқда.
Фуқаролар учун қулайликлар яратиш мақсадида Жиззах вилояти Ички ишлар органлари фаолиятини мувофиқлаштириш бошқармаси ЙҲХБ масъул ходими хизмат кўрсатиш учун бириктирилган», — дейилади ЙҲХББ хабарида.
Шунингдек, видеолавҳага «Машиналарни ноқонуний равишда жарима майдонига қўйиш ҳолати ҳам кузатилмоқда...» изоҳи келтириб ўтилган. Маълум қилинишича, Маъмурий жавобгарлик тўғрисидаги кодекснинг 291-моддасига кўра, йўл ҳаракати қоидаларини бузганлик учун жарима солиш ҳақида қарор чиқарилган кундан эътиборан олтмиш кун ичида жарима тўланмаган тақдирда, транспорт воситаси жарима солиш тўғрисида қарор чиқарган ваколатли орган раҳбарининг ёзма кўрсатмасига биноан жарима солиш тўғрисидаги қарорнинг ижроси юзасидан иш юритиш тугагунига қадар ушлаб турилиши белгиланган.
Мавзуга доир:
Изоҳ (0)