Буюк Британия қироллик ҳаво кучларига тегишли самолёт Жанубий Атлантика океанидан оқиб кетаётган дунёдаги энг катта айсбергни суратга олди, деб ёзмоқда Meduza. А68а деб номланган ушбу айсберг 2017 йил июль ойида Антарктида шелф музликларидан ажралиб чиққан.
Ўша вақтда унинг майдони 6 минг квадрат километрга тенг эди. Вақт ўтиши билан А68а мутахассисларни ҳайрон қолдириб, бир неча қисмларга бўлиниб кетмади, фақат ўз вазнини бироз йўқотди, холос. Ҳозирда унинг майдони 4,2 минг квадрат километрга тенг.
Бироқ янги суратлардан кўринишича, айсберг тезлик билан парчаланмоқда. Сунъий йўлдошдан олинган суратлар ҳам сўнгги ҳафталарда унинг қирралари қисман қулаганини кўрсатган. А68аъда кўплаб парчалар ва ёриқлар кўринган, унинг атрофида муз бўлаклари бор, ватерлиниялар остида бутун бошли туннеллар ўтган. Айсбергнинг айрим ажралган қисмлари шу қадар каттаки, кемаларга хавф туғдириши мумкинлиги сабабли олимлардан кўпроқ эътибор талаб қилади.
А68аъни кузатиш ҳамон давом этмоқда. Келаси ҳафта ва ойда айсберг ўзини қандай тутишини тушуниш учун янги фотосурат ва видеолар таҳлил қилинади. Ҳозир у Буюк Британиянинг Жанубий Жоржия денгизорти ҳудудидан 200 километр узоқликда унга қараб ҳаракат қилмоқда. А68а орол яқинидаги саёз сувли жойда тиқилиб қолиш эҳтимоли мавжуд. Агар шундай бўлса, у ерда яшовчи денгиз мушуги ва пингвинлар озиқланишда жиддий қийинчиликларга дуч келиши мумкин.
Изоҳ (0)