Қош тўкилиши, қўрқинчли тушлар: Инкор этмаслик тавсия қилинадиган организмдаги 5 ўзгариш

Саломатлик билан боғлиқ ўзгаришлар, муаммолар ташқи кўринишдаги ўзгариш ва кўзга кўринадиган белгилар орқали ўзини намоён қилади. NBC News компаниясининг тиббиёт маслаҳатчиси танада акс этиши мумкин бўлган симптомлар ҳақида маълумот беради.

Тилдаги ўзгаришлар

Тилда оқ қуруқ ва тушунарсиз шаклдаги доғларнинг пайдо бўлиши аутоиммун касаллиги — целиакийга хос симптом бўлиши мумкин. Ушбу касалликда глютен истеъмоли ингичка ичак фаолиятини ёмонлайди. Шифокорларнинг маълум қилишича, бунда тил «географик картага» ўхшаб кўринади. Диарея, кўнгил айниши, қайт қилиш ва вазн ортиши целиакийга хос бошқа симптомлар саналади. Тил ёки оғизда қандай ўзгариш бўлишидан қатъи назар, шифокорга мурожаат қилишни унутманг.

Ширинлик ейишни хоҳлаш

Ширинлик, шоколад ёки печенье емасдан туролмаслик организмнинг сувсизланганидан дарак бериши мумкин. Бунда организм овқатдан энергия олиш учун шакарни гликогенга айлантириб беришга қийналади ва шу сабаб ҳам ширинлик истайди. Бу кўпинча чанқоқ сабаб юз беради ва бундай вақтда суюқликка етишмовчилигини қоплаш учун таркибида сув миқдори кўп бўлган мева ва сабзавотлар ёки сув-туз балансини яхшилайдиган ичимлик истеъмол қилиш тавсия қилинади. Организм сувсизланганда, шунингдек, бош оғриши, кўриш қобилиятининг сусайиши, тер ажралмаслиги, сийдикнинг тўқ рангга кириши, ҳарорат ортиши ва тери қуриши кузатилади.

Оёқ-қўлда оғриқ

Ахиллов пайи товон суягига бириккан бўлиб, болдирни букиш, гавдани тик тутишга ёрдам беради. У тўпиқнинг орқа қисмида жойлашган бўлади. Айнан ушбу соҳадаги оғриқ, псориазга хос симптом саналади. Псориазни даволаш миллий фондининг маълумотларига қараганда, оёқ ва қўл бармоқларининг шишиб кетиши ҳам псориатик артрит бошланаётганидан дарак бериши мумкин.

Ёмон ва қўрқинчли тушлар кўриш

Аёл киши шундай тушлар кўрадиган бўлса, ҳомиладор бўлиши ҳам мумкин. Ҳомиладорлик вақтида ҳар хил тушлар кўриш боиси аниқ эмас. Бу гормон ўзгариши ёки ҳомиладорликка хос кўпроқ ухлаш билан боғлиқ бўлиш эҳтимоли ҳам йўқ эмас.

Қош тўкилиши

Қош толаларининг тўкилиши гипотериознинг симптомларидан бири бўлиши мумкин. Гипотериозда қалқонсимон без организмга керагидан камроқ гормон ишлаб чиқаради. Айниқса, бу ҳолат кўпроқ 60 ёшдан катта аёлларда кузатилади. Вазн йўқотиш, юракнинг меъёрдан кам ёки кўп уриши, тер ажралишининг кўпайиши ва жиззакилик мазкур касалликка хос бошқа аломатлар саналади.