Туғруқ вақтида кучли бел оғриғи ҳар учта аёлнинг бирида кузатилади. Сабаби буларнинг барчаси боланинг боши туғруқ канали бўйлаб ҳаракатланаётганда тос суяги ва асаб толаларининг чўзилиши билан боғлиқ. Орқа қисмдаги асаб толалар терига яқин бўлиб, у оғриқни келтириб чиқаради.
Баъзи аёллар оғриқ шу қадар кучлилигидан, оғриқ қолдирувчи дори воситаси − эпидурал анестезияни қўллайди. Бунинг учун умуртқа поғонасига ингичка найча киритилади ва аста-секин у орқали ҳушсизлантирувчи юборилади. Аммо ушбу жараён анестезиологлар томонидан амалга оширилиши керак, сабаби асаб бузилиши хавфи мавжуд. Шунингдек, бир мунча вақт пешоб пуфагининг назорати йўқолиши мумкин ва босим кескин пасайиши кузатилади. Эпидурал анестезия оқибатида аёл туғруқдан кейингина ўзига келиши мумкин. Британиялик шифокорларнинг фикрига кўра, ҳар 50 минг онадан бир аёл бир ёки икки оёғида сезгирликни йўқотиши ҳам мумкин.
Бироқ шифокорлар туғруқ вақтида оғриқни енгиллаштирадиган мутлақо зарарсиз воситани топди. Ушбу усул узоқ вақт давомида Швеция, Канада ва Австралияда қўлланилган. Яқиндан бошлаб эса Англиянинг баъзи туғруқхоналарида қўллана бошланди.
Унга кўра, туғруқ вақтида аёлдаги оғриқни укол ёрдамида сув билан енгиллаштириш тавсия этилди. Оксфорд ва Австралиянинг Квинсленд университети томонидан ўтказилган катта тадқиқотлар шуни кўрсатдики, сув билан укол қилиш бел оғриғини сезиларли даражада камайтиради. Энг муҳими, она ва болага зарар етказмайди.
Бир чой қошиқ сув умуртқа поғонасининг пастки тўрт нуқтасига укол орқали юборилади. Сув укол қилинган жойларда енгил ачишиш ҳиссини келтириб чиқаради ва бел оғриғига сабаб бўлувчи асаб толаларини безовта қилади. Бу эса уларни бел оғриғидан чалғитади ва мияга енгил санчиш сигналини юборади.
Ачишиш ҳисси атиги ярим дақиқа давом этса-да, оғриқ сигналлари уч соатгача безовта қилмайди. Албатта, сувнинг ҳаммаси ҳам яроқли бўлавермайди. Беш йиллик тадқиқотлар натижасида олимлар бир гуруҳ аёлларга стерилланган сув, бошқа гуруҳга эса физиологик эритма юборилган ва улар ўзаро таққосланган.
Маълум бўлишича, стерилланган сув узоқроқ туради. Физиологик эритма таркибида тана ҳужайраларидаги суюқлик каби нисбат мавжуд. Шунинг учун эритма терига кирганда, тезроқ сўрилади ва таъсири бир неча дақиқага етади холос.
Стерилланган сув тери остида кўпроқ туради. Шунинг учун оғриқ қолдирувчи таъсири узоқ вақт давом этиши мумкин. Тадқиқот натижаларига кўра, туғруқдан кейин аёлларнинг аксарияти 90 дақиқагача оғриқни 30-50 фоизга камайтириши ҳақида хабар берган.
Шунингдек, стерилланган сув арзон ва оддий акушер ҳам уни амалга ошириши мумкин. «Сув уколи туғруқ жараёнига таъсир қилмайди, гарчи жараён билан боғлиқ бел оғриғини енгиллаштирса ҳам», − дейди тадқиқот муаллифлари.
Изоҳ (0)