Ота-онасининг қаршилигига қарамай актрисаликка қадам қўйган Болливуд юлдузлари (фото)

Аксарият актёр ва актрисалар фарзандлари ёки оила аъзоларини кино санъатига кириб келишига йўл қўймайди. Балки улар бошидан ўтказган қийинчиликлар учун қарши чиқар ёки танлаган касбидан афсуслангани учун шундай йўл тутар. Лекин кино санъатига чинакам муҳаббат қўйганлар ҳар қандай тўсиқни енгиб ўтишда ўзида куч топади, худди қуйида келтирилган қаҳрамонлар каби.

Соха Али Хон

Соха Али Хон – актриса Шармила Тагор ва крикетчи Мансур Али Хоннинг қизи. У 25 ёшида актриса бўлишга қарор қилган, аммо бунга ота-онаси қарши чиққан. Ҳаттоки унинг акаси актёр Саиф Али Хон ҳам ҳайрон бўлган. Лондон иқтисодиёт ва сиёсатшунослик мактабининг магистр даражасига эга бўлган Оксфорд университетининг битирувчиси Соха банкда ишлаган, аммо 2004 йилга ҳаммасидан воз кечиб, кино санъатига қадам қўйган.

«Мен актриса бўламан, деб ўйламагандим. Аммо банкда ишлагандан сўнг бу касб меники эмаслигини англаб етдим. Аввалига актриса бўлсам, барча акам ва онам билан мени таққослайди ва осон йўлни танлаганимни таъкидлашади, деган фикр бор эди. Аммо ортиқ кута олмасдим, театр ва рол ижро этишни яхши кўрардим», − дейди илк дебютини «Юрак кўпроғини сўрайди» фильмида Шахид Капур билан ижро этган Соха.

Бхуми Педнекар

Конференцияларнинг бирида нутқ сўзлаган Бхуми оиласига актёрлик ҳақида гапириш осон эмаслигини тан олган, чунки унинг оиласида кино соҳасига алоқадор ҳеч ким йўқ эди.

«Мен ота-онамни актриса бўлишимга қандай ишонтириш ҳақида ўйлар эдим. Бобом бир вақтлар театрда рол ижро этган бўлсада, фильмларда қаҳрамон бўлиш оиламиз учун тақиқланган эди. Шунингдек, мен юрист, муҳандис ва шифокорлар орасида улғайдим. Улар менинг қароримни худди душманлардек қабул қилди ва мени бу йўлдан қайтаришга уринди», − дейди Бхуми.

16 ёшга тўлган Бхуми кино мактабига боришга қарор қилади ва тўловни амалга ошириш учун талабалик кредитидан фойдаланади.

«Нима қилишни билмас эдим, аммо ўжарлигим ҳам қолмади. Кино мактабига ўқишга кирган бўлсамда, у ердан четлаштирилдим. Бу ролларни ёмон ижро этганимдан эмас, балки интизом учун эди. Бу эса ҳаётимдаги энг катта пушаймонлардан бири бўлиб қолди. Шундан сўнг ота-онам умуман актёрлик ҳақида ўйлашимни тақиқлади ва бир неча ой мобайнида ўқишимга тўланган кредитнинг қарзини тўлади», − дейди Бхуми.

Унинг учун ҳаммасини қайтадан бошлаш жуда қийин бўлган. Аммо Бхуми Yash Raj Films кастинг бўлимидаги ишлаб чиқариш уйига ишга киради ва у ерда 5 йил ишлайди. 2015 йилга келиб, Аюшман Хурана бош ролни ижро этган «Қувватингни бер/ Менинг келиним ХХЛ» фильмида рол ижро этган.

Кангана Ранаут

Кангананинг отаси тадбиркор Амардип ва онаси мактаб ўқитувчиси Аша ҳар доим қизининг шифокор бўлишини орзу қилар эди. Мактабдан сўнг Кангана Симладаги Илмий коллежга ўқишга киган, лекин у жуда яхши ўқишига қарамай, бу касбда ишлай олмаслигини англаган.

«Мен дастлаб шифокор бўлишни истар эдим. Аммо талабалар илм олишнинг бир неча вариантига эга, мен Деҳлига кўчиб ўтдим ва у ерда ўзимни театрда синаб кўришга қарор қилдим», − дейди актриса.

«Ҳали бир қарорга келиб улгурмасимданоқ, суратларимни реклама агентликларига юборганман. Ҳаттоки француз тилини ҳам ўрганишни йўлга қўйган эдим, чунки Парижда моделлар учун бир қанча имкониятлар мавжуд эди. Кейинчалик мактабни ташлаганимни билган ота-онам мени уйдан ҳайдаган. Орамиздаги муносабатлар ҳам тўхтаган. Кейинчалик Мумбайга кўчиб кетдим, мен учун жуда қийин дамлар эди. Улар мени қийинчиликда қолганимни билгач, пул юборишган, лекин мен қабул қилмадим», − дейди Кангана.

У бир қанча қийинчиликларни енгиб ўтиб, бугунги кунда Ҳиндистоннинг энг таниқли актрисасига айланган.

Каришма Капур

Капурлар сулоласида деярли барча эркаклар кино соҳасига алоқадор, аммо аёлларга бу борада рухсат берилмаган. Шунинг учун ҳам Каришма кино оламига кириб келганида, унинг отаси Рандхир қизининг қарорини қабул қилмаган. У фильмларда рол ижро этадиган аёлларни ёқтирмас эди. Аммо Каришма ва унинг онаси Бабита ўз қарорида содиқ қолди. 17 ёшида Каришма мактабни ташлаб, «Севги гаровлари» фильмида бош ролни ижро этди.

Жанви Капур

Оммавий ахборот воситалари кўпинча Шридевининг қизлари – Жанви ва Кушини Кардашяннинг ҳиндистонлик сингиллари деб атайди. Ёшлигиданоқ омманинг эътиборида бўлган қизлар Болливудда юлдузга айланиши аниқ эди. Аммо ундай бўлмади.

«Жанви фильмда суратга тушмоқчи эканлигини айтди, аммо мен бунга қарши эдим. Болливуд ёмон жой эмас, уни жуда яхши биламан. Лекин она сифатида унинг турмуш қурганидан хурсанд бўлар эдим», − дея таъкидлаган актрисанинг марҳума онаси Шридеви.

Эҳтимол, Шридеви ўзи  кўрган қийинчиликларни қизига раво кўрмаганлиги учун ҳам қарши бўлгандир. Аммо Жанви ўзининг дебютини 2018 йил «Юрак уриши» фильми билан бошлади ва буни кўриш унинг онасига насиб этмади.

Сара Али Хон

Саиф Али Хон ягона қизи Сара ота-онасининг изидан бориб, актриса бўлишни хоҳлаётганини билгач, унинг қароридан норози бўлган. Чунки ушбу соҳада 25 йилдан буён ишлаган актёр ўз касбини беқарор, деб билади.

Шунинг учун қизини Нью-Йоркдаги Колумбия университетига тарих ва сиёсатшуносликдан таълим олиши учун юборган. Ўша вақтда унинг қизи оғир вазнга эга бўлиб, фильмларда рол ижро этиши ҳақида бирор нарса дейиш қийин эди.

«Дадам менга актриса бўлишимга имкон берадиган иккита шартни қўйди, биринчиси, олий маълумотли бўлиш. Иккинчиси вазн йўқотиш. У иккинчи шартни амалга оширолмайди, деб ўйлаганди», − дейди Сара.

«Саранинг малакасини ҳисобга олса, у Нью-Йоркда бемалол ишлаши ва яшаши мумкин. Актрисалик унга нима учун кераклигини тушунмайман», − дейди Саиф Али Хон. Аммо Сара буни амалга оширди. У уч йилда ўқишни тамомлаб, бир ярим йил вазни устида ишлади. У дебют ролини «Кедарнатх» фильмида ижро этди ва айнан дебют роли учун «Энг яхши актриса» мукофотига сазовор бўлди.