Марадонанинг неаполлик бемор болага ёрдам бериш учун клубга қарши чиқиб, лой майдонда ўйнаб гол ургани ҳақида кичик ҳикоя

Балки, сиз Марадонанинг лой ичидаги ғалати майдонда рақибларини бирма-бир алдаб ўтаётгани тасвирланган видеоларни кўргандирсиз.

Ушбу воқеа 1985 йилда содир бўлади, 24 ёшли Диего ўша вақтдаги рекорд кўрсаткич эвазига (14 миллиард лира, тахминан, 7,6 миллион доллар) «Барселона»дан «Наполи»га кўчиб ўтганди.

Футболчи Неаполь яқинидаги Ачерра шаҳрига (аҳолиси 50 минг киши) хайрия учрашувида иштирок этиш учун таклиф қилинади. Хайрия Францияда қиммат операцияни бошдан ўтказишга муҳтож бўлган бемор болага пул йиғиш учун ташкиллаштирилганди. Клуб раҳбарияти ва суғурта компанияси бунга қарши чиқди, аммо Марадона ўйлаб ҳам ўтирмай рози бўлди. Уни италиялик жамоадоши Петро Пузоне чақирганди, ундан эса боланинг отаси илтимос қилганди.

Диего ўша учрашувда бир нечта гол урди, шулар қаторида ушбу мини-шедевр ҳам бор эди:

https://twitter.com/football_mumble/status/1229421970707636224

Бошқа бир тахминга кўра, Марадонанинг шахсан ўзи «Наполи» ва ФИФАдан болакайга ёрдам бериш учун хайрия учрашувини ташкил қилишни сўрайди, бироқ улар буни рад этади. Шунда ҳамма нарсани Марадонанинг ўзи ташкиллаштиради. Италян нашрларининг ёзишича, ўйинга 5 мингдан ортиқ томошабин ташриф буюрган.

Қуйидаги видеода трибуналарнинг тўлиб-тошганини кўриш мумкин:

Марадона Италияга кўчиб ўтганидан кейинги биринчи интервьюсида: «Мен Неаполнинг камбағал болалари учун кумирга айланмоқчиман, чунки ўзим ҳам Буэнос-Айресда шундай яшардим» — деганди.

Якунда Диего режани ошириб ҳам юборди ва ҳар бир неаполликнинг кумирига айланди. Клуб билан биргаликда у икки маротаба А Серияда, бир мартадан УЕФА Кубоги, Италия Кубоги ва Италия Суперкубогини қўлга киритди.

Бугун эса неаполликлар Марадона билан кўзида ёш билан хайрлашмоқда.