Ўзбекистон терма жамоаси ва «Бунёдкор» клуби бош мураббийи Вадим Абрамов тошкентликлар собиқ ярим ҳимоячиси Жасур Жалолиддиновнинг «Локомотив»га трансфери атрофида юзага келган гаплар ҳақида ўз фикрини билдирди.
«Ҳамма ўз ишини қилгани яхши. Танқид ўринли бўлса, бу ўз фойдасини беради. Ҳозирда ўзи тушунмаган соҳага аралашиш урфда. Барча журналистларга Жасур Жалолиддинов трансфери масаласида ёзиш қизиқарли бўлди. Бу одамларга қизиқарли эди, шу сабаб улар бунга қўл урди. Терма жамоа бош мураббийи сифатида мени унинг ўйин амалиётисиз қолиб кетаётгани хавотирга солмоқда. Негадир бу ҳақида сўрашмайди.
Мен учун уларнинг ўйин амалиётига эга бўлиши жуда муҳим. Агар у йўқ бўлса, легионерлардан нима фойда? Бу масалани ҳеч ким олиб чиқмайди, бироқ гап трансфер ҳақида борса, бу ҳамма учун қизиқ», — дейди Абрамов.
«Дарё» маълумотномаси
Жасур Жалолиддинов — 2002 йил 15 майда Навоийда туғилган. 2018 йил 2 август санасида «Бунёдкор» сафида Суперлига доирасида дебют ўйинини «Қўқон-1912»га қарши ўтказган. У дебют қилган вақтда 16 ёш 80 кунлик эди. Бу орқали у Ўзбекистон чемпионатида майдонга тушган энг ёш футболчига айланганди. 2019 йил октябрида The Guardian талқинига кўра, дунёнинг энг истеъдодли 60 футболчиси рўйхатида қайд этилган. 2019 йил якунларига кўра, Суперлиганинг энг яхши ўйинчиси деб топилган. 2019 йил декабрида Италиянинг «Беневенто» клуби кўригида бўлган.
2020 йил июль ойида «Бунёдкор»нинг ўша вақтдаги директори Улуғбек Мирзаев Жасур Жалолиддинов 350 минг евро эвазига Москванинг «Локомотив» клубига ўтаётганини тасдиқлаганди. Орада «Чемпионат» нашри «Локомотив» Жалолиддинов учун 1 миллион евро сарфлашини, маблағнинг 100 минг евроси футболчининг «Бунёдкор» билан амалдаги шартномасини бекор қилишга, қолган 900 минг евро эса Жасурнинг агентларига насиб этиши ҳақида маълум қилди. 29 июль куни эса москваликлар Жасурнинг трансферини эълон қилди. Август ойи аввалида «Бунёдкор» директори Улуғбек Мирзаев ишдан кетгани айтилди. Шундан сўнг август ойида Профессионал футбол лигаси Жасур Жалолиддинов трансферида шубҳали жиҳатлар борлигини эълон қилиб, Ўзбекистон футбол ассоциациясига мурожаат қилгани айтилди. Ушбу мурожаат натижалари ташкилот расмий сайтларида эълон қилинмади. Аммо «Championat.asia» сайти ушбу масалада Улуғбек Мирзаев барчасини клуб фойдасига ҳал этганини ва тез орада унинг ўзи нашрга интервью беришини эълон қилди.
Қайд этиш жоиз, Жасур Жалолиддинов мавсум сўнгига қадар «Локомотив» томонидан «Тамбов» клубига ижарага берилди. У янги жамоасида 7-рақам остида ҳаракат қилади.
- «Жалолиддинов иши»: «Бунёдкор» ва «Локомотив» ўртасидаги воситачилар 550 минг еврони ўзлаштирган
- Жасур Жалолиддинов нима сабабдан «Бешиктош» таклифини рад этганини маълум қилди
- Вадим Абрамов Ўзбекистон терма жамоасидаги алмаштириб бўлмас футболчи кимлигини айтди
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)