Тошкент шаҳрида 116-сонли йўналиш бўйича ҳаракатланувчи автобусда ёнғин содир бўлди, дея хабар бермоқда Фавқулодда вазиятлар вазирлиги.
Маълум қилинишича, автобус 2020 йилнинг 24 ноябрь куни соат 06:13 да Тошкент кичик ҳалқа йўлида, 116-сонли йўналиш автобус ҳайдовчиси илк йўловчиларни олиб кетиш мақсадида автотураргоҳдан терминал станциясига қараб чиқиб кетаётган вақтда ёниб кетган.
Воқеа жойига 4 дақиқадан сўнг Тошкент шаҳар Фавқулодда вазиятлар бошқармаси ёнғин-қутқарув гуруҳлари етиб келган. Соат 06:26 да ёнғин қуршаб олинган ва соат 06:39 да тўлиқ бартараф этилган.
Автобус ёниб кетишига двигатель бўлинмасидаги қисқа туташув сабаб бўлгани тахмин қилинмоқда. Ушбу воқеада жабрланганлар йўқ. Ёнғин бошланишидан олдин автобус ҳайдовчиси ўз вақтида йўловчилар бўлинмасидан чиқиб кетишга муваффақ бўлган.
Эслатиб ўтамиз, йил бошида Тошкентда 8-йўналишда қатнайдиган Mercedes автобуси ёниб кетган эди.
Изоҳ (0)