1900 йилнинг 22 ноябрида илк Mercedes тақдим этилган. Дунёга машҳур автомобиль маркаси пайдо бўлганига 120 йил тўлиши муносабати билан «Коммерсантъ» ушбу автомобиль компанияси тарихига оид маълумотларни тўплаб тақдим этди.
35HP модели Mercedes’нинг илк автомобилига айланган. У муҳандис-конструктор Вильгельм Майбах томонидан австриялик тадбиркор Эмиль Еллинек буюртмасига асосан яратилган ва айнан унинг қизи шарафига номланган. Автомобиль устидаги ишлар 1900 йилнинг ноябрида якунланган. У 35 от кучига эга двигатель, узун ғилдираклар базаси, пўлат кузовга эга бўлган. Барқарорлик яхши таъминланиши учун оғирлик маркази пастга йўналтирилган.
1902 йилда Daimler Motoren Gesellschaft компанияси янги моделни — Mercedes Simplex’ни тақдим этган. Афсоналарга кўра, 1903 йилда Вильгельм Майбахнинг (рулда ўтирган) шахсан ўзи автомобилни Германия императори Вильгельм II га намойиш этган. У эса ўз ҳайратини яширмаган ҳолда «Ҳа, автомобилингиз ажойиб… Шунга қарамай мен отга ишонаман. Автомобиль — бу шунчаки вақтинчалик ҳодиса», деган.
Mercedes-Benz фирмасига катта машҳурлик 1927 йилдан бошлаб S (Sport) сериясига кирувчи автомобиллар ишлаб чиқарила бошланганидан кейин келган. Улар кўплаб мусобақаларда рекорд ўрнатган. Компрессор двигателлер оддий режимда 120 от кучи, ёқилганида эса 180 от кучини тақдим этган. S серияси Фердинанд Порше ўзининг шахсий фирмасини яратишдан олдин Mercedes’да яратган сўнгги иши ҳисобланади.
Mercedes-Benz 770 — 1930 йилдан 1943 йилга қадар ишлаб чиқарилган премиум-синфга оид автомобиль. Уни юқори мартабали нацист амалдорларининг Иккинчи жаҳон урушидан олдин ва кейинги архив суратларида учратиш мумкин. Ўз вақтида ушбу автомобилдан япон императори Хирохито, Рим папаси, рейхспрезидент Паул фон Гинденбург, Адольф Гитлер, Герман Геринг, Вильгельм II фойдаланган.
Mercedes-Benz W136 1936 йилдан 1953 йилга компаниянинг энг кўп сотилган автомобилига айланган. Ушбу машина ўзидан олдинги аждодидан арзонроқ ва замонавийроқ бўлган. Уруш бошлангунига қадар 75 минг нусхага яқин ишлаб чиқарилган бўлса, 1947 йили ишлаб чиқариш қайта бошлангач эса 83 мингдан ортиқ.
Mercedes-Benz W198 (300SL) — компаниянинг урушдан кейин ишлаб чиқарган биринчи спорт автомобили ҳисобланади. Уни яратиш ғояси америкалик дилер Макс Хоффманга тегишли бўлиб, у АҚШнинг бой қатлами тезюрар автомобилларга қизиқиш билдираётганини пайқаб қолган. Аввалига машина икки ўриндиқли купе кузовида ишлаб чиқарилган, 1957 йилда эса очиқ версияси — родстер пайдо бўлган.
Mercedes-Benz W114 / W115 — 1968 йилдан 1976 йилга қадар ҳақиқатда оммавий серияда ишлаб чиқарилган бизнес-классга кирувчи автомобиль. Унинг дизайнини франциялик дизайнер Пол Брак яратган. Компания жами шу турдаги автомобилдан 1,9 миллион нусха ишлаб чиқарган.
G-класс эса Mercedes-Benz компанияси акционери ҳисобланган Эрон подшоҳи Муҳаммад Ризо Паҳлавийнинг таклифига биноан ҳарбий транспорт воситаси сифатида яратилган. Автомобилнинг фуқароларга мўлжалланган версияси 1979 йилда тақдим этилган. G-класс ўнлаб йиллардан бери қолган синфдаги автомобиллардан фарқли ўлароқ ташқи кўринишини ўзгартирмай келмоқда.
Mercedes-Benz W116 — 1972 йилнинг сентябридан 1980 йилга қадар ишлаб чиқарилган серия. Ушбу автомобиль компания томонидан S-Class деб ном қўйилган биринчи модель ҳисобланади. Бунга қадар седан кузовига эга моделлар норасмий равишда «S» тижорий индексига эга бўлган.
А-Class’га кирувчи илк авлод 1997 йили Франкфурт автосалонида тақдим этилган. W168 компания маҳсулотлари орасидаги ноодатий моделга айланган: калта кузовидан ташқари автомобиль олд етакчи ғилдираклар билан жиҳозланган. А-Class’га кирувчи моделлар асосан Европа, Япония ва Россияда сотилган.
1990 йиллар афсонаси — Mercedes-Benz 600 СЕL. W140 моделининг тақдимоти 1991 йили Женева автосалонида бўлиб ўтган. У кўплаб янгиликларни ўзида жамлаган: аэродинамик корпусдан ташқари автомобиль иккиталик ойнага, автоматик равишда ёпиладиган эшиклар ва юкхона, иқлимни назорат қилиш тизимига эга бўлган.
Mercedes-Benz енгил автомобиллардан ташқари фургонлар, юк машиналари ва автобуслар ишлаб чиқаради.
Mercedes жамоаси «Formula-1» пойгаларида ҳам иштирок этиб келади. Daimler-Benz концерни 1954 йилги серияда муваффақиятли иштирок этган. Бироқ 1955 йилда компания серияни тарк этган ва 1990- ҳамда 2000 йилларда мотор етказиб берганига қарамай, 2009 йилнинг ноябригача завод жамоаси сифатида иштирок этмаган. Mercedes — етти карра Инструкторлар кубоги соҳиби (2014, 2015, 2016, 2017, 2018, 2019 ва 2020).
2020 йил 19 ноябрь куни Mercedes-Benz ўзининг сўнгги модели — Maybach S-Class’ни тақдим этди. Автомобилнинг техник тавсифи ҳозирча ошкор этилмаган. Седан фақат тўлиқ узатмали ва 9 поғонали узатмалар қутисига эга версияда тақдим этилади.
Изоҳ (0)