Омад ҳамиша ҳам келавермайди. Зинедин Зиданнинг «Реал»даги «қора» кунлари ҳақида

Зинедин Зидан «Реал»га олиб берган кўп сонли совринларига қарамай, у бир неча марта иш жойидан ҳайдалиш арафасигача келган. Бунга сабаб эса жамоанинг кетма-кет бир нечта ўйинлардаги ўта қониқарсиз натижалари бўлган. Испаниянинг Marca нашри айнан Зизунинг «Реал»даги «қора» кунлари ҳақида мақола тайёрлади. «Дарё» ушбу мақолани ўқувчиларга ўзбек тилида тақдим этади.

2015/16 йилги мавсум: тўлиқ тикланишгача бўлган учта муваффақиятсизлик

«Кастиля»даги мураббийликдан сўнг Зидан дарҳол «Реал»ни қабул қилиб олди. Табиийки, бу кўпчиликда шу жумладан, клуб раҳбариятида ҳам шубҳа уйғотди. Францияликни диққат билан кузатиб боришди, унинг старти эса кутилганидек, осон кечмади. Жамоа Зидан бошчилигида «Бетис» ва «Малага» билан дуранг қайд этди ҳамда «Атлетико»дан аламли мағлубиятга учради. Аммо шундан сўнг у жамоани руҳлантира олди ва мавсумни кетма-кет 12 та ғалаба билан якунлади, шулардан бирида «Барселона» «Камп Ноу»да таслим этилди. Шу тариқа «қироллик клуби» сўнгги паллагача чемпионлик учун кураш олиб борди.

2015/16 йилги мавсум: Чемпионлар Лигаси чорак финалидаги «Вольфсбург»га қарши ўйин

Бу Зиданнинг Мадриддаги фаолиятидаги кескин бурилиш эди. Ўша пайтга келиб, «қаймоқранглилар» аллақачон Кубок ва чемпионатдан умид узиб, бор эътиборини фақат Чемпионлар Лигасига қаратганди.

Чемпионлар Лигасидаги иштирокни ҳам муддатдан олдин якунлаш Зиданни ишдан бўшатилишига олиб келиши аниқ эди. «Вольфсбург»нинг 2:0 ҳисобидаги ғалабаси эса «Реал» ва Зиданни карахт аҳволга солиб қўйди. Бироқ «Сантьяго Бернабеу»даги камбэкдан сўнг «Реал» Миландаги финал баҳсида ўн биринчи чемпионликни тантана қилди.

2017/18 йилги мавсуми: лигадаги муаммолар, Кубокдаги муваффақиятсизликлар

Зидан жамоаси Ла Лига темпидан тушиб қолган ва совринларга бўлган ташналик йўқдек туюларди, французнинг ўша мавсум охирида клубни тарк этиши сабабларидан бири ҳам шу эди. Бундан ташқари, «Леганес» «қаймоқранглилар»ни Кубок баҳсларидан чиқариб юборди. Шундан сўнггина яна Чемпионлар Лигаси ёрдамга келди. Аввалига 1/8 финалида ПСЖ мағлуб этилди, сўнгра «Ювентус», «Бавария» ва «Ливерпуль». Шу аснода жамоа Чемпионлар Лигасининг 13-совринини қўлга киритди.

2019/20 йилги мавсум: «Атлетико»га қарши 3:7 ва ПСЖ билан 0:3

Зиданнинг қайтишидан кейинги мавсум дарҳол натижа бермади. Ҳаммаси мавсумолди тайёргарликлардан бошланди: АҚШда «Атлетико»дан 3:7 ҳисобидаги мағлубиятдан яна Зиданнинг салоҳиятига шубҳа қилувчилар пайдо бўла бошлади. Шундан сўнг Ла Лиганинг дастлабки уч турида иккита дуранг ва ПСЖга 0:3 ҳисобидаги мағлубият рўй берди. Зиданга бўлган ишонч эса тобора камайиб борарди. Зизу бу муваффақиятсизликларга «Севилья»ни (1:0) мағлуб этиш билан барҳам берди. Шундан сўнг «Ванда Meтрополитано»да 0:0 ҳисобидаги ғалабага тенг дуранг қайд этилди.

2019/20 йилги мавсум: Еврокубоклардаги мураккаб вазият ва «Мальорка»дан учралган мағлубият

Биринчи инқироздан сўнг иккинчиси ҳам юз берди: жамоа Чемпионлар Лигасининг биринчи турида меҳмонда ПСЖга ютқазди, кейин эса Мадридда «Брюгге»га имконият бой берилди. Буларнинг барчаси 1/8 финалга чиқиш эҳтимолини тобора қийинлаштирарди. Бир неча кундан сўнг Ла Лигада «Мальорка» ҳам «Реал»ни мағлуб этиб қўйди. Зидан ишдан бўшатилишга жуда яқин келди, аммо жамоа яна реакция кўрсатиб, Чемпионлар Лигасида «Галатасарой»га қарши иккита «финал» ўйинида ғалаба қозонди ва мусобақадаги ҳолатини яхшилаб олди. Шунингдек, Ла Лигада ҳам мағлубиятсиз сериялар бошланди. Саудия Арабистонида бўлиб ўтган Испания Суперкубогидаги ғалаба эса жамоанинг тикланишида асосий ролни бажарди.

2019/20 йилги мавсум: «Леванте», «Манчестер Сити» ва «Бетис»

«Реал» учун 2020 йил ҳам кўнгилдагидек бошланмади: Испания Кубогида «қироллик клуби» «Сосьедад»га ютқазди, «Манчестер Сити» (Чемпионлар Лигасида) эса «Бернабеу»га «қаймоқранглилар»ни таслим этиб кетди. Шундан сўнг лигада ҳам икки бор «Леванте» ва «Бетис»га имконият бой берилди. Бироқ COVID-19 пандемияси туфайли футбол ўйинлари тўхтатилди, бу эса Зидан шогирдларига тикланиш ва Ла Лигада ўсиш имконини берди. «Сити»га қарши жавоб учрашувининг аччиқ натижаларига қарамай, «Реал» мавсумни юқори нотада якунлади, Зизунинг мавқейи эса яна-да мустаҳкамланди.

2020/21 йилги мавсум: «Кадис» ва «Шахтёр»га қарши ўйинлар

Бир неча ҳафта олдин Зиданнинг (ҳозирча) охирги инқирози юз берди: Ла Лига дебютанти «Кадис» ва жароҳатлар исканжасида қолган «Шахтёр»дан қабул қилинган жиддий мағлубиятлардан сўнг яна Зизунинг истеъфоси ҳақидаги тахминлар илгари сурилди. Аммо Зидан бу гапларга аҳамият бермай ўз ишини қилишда давом этди ва якунда тахминларни таг-туги билан йўқ қилиб ташлади: «Камп Ноу»да «Барселона» даҳшатли тарзда таслим этилди, ушбу ғалабадан руҳланиб, жамоа Чемпионлар Лигаси ва Ла Лигадаги ўрнини ҳам тиклаб олди.