Организмга йил давомида витаминлар ёрдами керак, аммо куз охири ва қиш фаслида бу эҳтиёж янада ортади. Хўш, қандай қилиб уни тўлиқ қондириш мумкин ва витаминларнинг самарали ишлашига нима ёрдам беради?
Совуқ мавсумда соғлиқ ва яхши кайфиятнинг энг муҳим манбаси ҳисобланган қуёш нури сезиларли даражада камаяди. Бундай вақтда қувватни йўқотмаслик, одатдаги фаоллик даражасини сақлаб қолиш учун истеъмол қилинадиган витаминлар миқдори ва сифатига алоҳида эътибор бериш муҳимдир. Совуқ мавсумда инсон танаси уларнинг қайси бирига кўпроқ муҳтож?
C витамини
C витамин гўзаллик соҳасидаги фойдали элементларнинг етакчисидир. Аммо унинг захирасини нафақат чиройли кўриниш, балки иммунитетни мустаҳкамлаш учун тўлдириш керак. Шунингдек, модда алмашинув жараёнини яхшилайди, умумий фаолликни оширади ва токсинларни танадан чиқариб ташлайди. Албатта, цитрус мевалар C витаминининг манбаси эканлигига ишонишади, лекин аслида у брокколи, гулкарам, карам, булғор қалампири, киви ва олмаларда мавжуд.
А витамини
А витамини ёки ретинол кучли яллиғланишга қарши хусусиятга эга. Бу тери, соч ва тирноқларнинг ҳолатини яхшилайди. Уни сабзи, ошқовоқ, хурмо, тухум, помидор, зайтун ёки кунгабоқар ёғи қўшилган салатлар, шунингдек, кўкатлардан топиш мумкин.
E витамини
Токоферол ёки E витамини қон айланишини яхшилайди, стрессни енгишга ёрдам беради. Бундан ташқари у муҳим антиоксидант вазифасини бажаради, эркин радикаллар пайдо бўлишини секинлаштиради ва асабийликдан ҳимоя қилади. E витамин кўпроқ исмалоқ, ёнғоқ, олма, ёғсиз гўшт ва зайтун мойи таркибида мавжуд.
B гуруҳи витаминлари
Улар стрессга чидамлиликни оширади ва асабийликни камайтиради. B гуруҳи витаминлари уйқусизликни тўғирлаш ва қуриган лаблар, заифлашган сочлар, тирноқларнинг ҳолатини яхшилашга ёрдам беради. B гуруҳи элементларининг керакли дозасини қабул қилиш учун сут маҳсулотлари, ёнғоқ ва гречка истеъмолини кўпайтириш зарур.
D витамини
Яна бир қишки сеҳрли таёқча D витамин бўлиб, у иммунитетни мустаҳкамлайди, кўплаб гормонлар синтезида иштирок этади, чарчоқни енгишга ёрдам беради. Уни ёғли балиқ, сариёғ ва тухум таркибидан топиш мумкин.
Ушбу қоидаларга мувофиқ ҳолда мунтазам тиббий кўрикдан ўтиш, жисмоний машқлар, қаришнинг олдини олиш, дам олиш ва севимли машғулотларни амалга ошириш керак.
Изоҳ (0)