«Барселона»да молиявий вазият тобора кескинлашмоқда
«Барселона» миллиардлаб даромад кўрадиган клуб, аммо у шу билан бирга миллиардлаб харажат ва қарзларга ҳам эга», – деганди Каталония клубининг собиқ президенти Хоан Лапорта 2020 йилнинг баҳорида.
Ўшанда у нафақат, Хосеп Бартомеунинг фаолиятини танқид қилган, балки клубнинг янги раҳбари бўладиган киши учун қийин даврлар бўлишини башорат қилганди. Буни билиш учун эса жуда бир катта мутахассис ёки эксперт бўлиш ҳам шарт эмасди. Собиқ президент Хосеп Бартомеу узоқ йиллик фаолиятидан сўнг барча директорлар кенгаши билан муддатидан олдин истеъфога чиқиб, ана ўша йиллар давомида тўпланиб келган муаммолар уюмини ташлаб кетди.
Вақтинчалик раҳбарият эса ҳозирда муаммоларни ҳал этиш ўрнига уларни яшириш билан овора. Банкротликка олиб келмаслик учун тезкорлик билан қабул қилинган футболчиларнинг ойлик маошларини вақтинча қисқартириш ҳақидаги хабарнинг эскириши биланоқ, Месси ва Неймар ҳақидаги янги хабарлар пайдо бўлди. Бу Мессининг ПСЖга ўтиши мумкинлиги ҳақида эмас, балки анчагина жиддий бўлган молиявий муаммолар ҳақида эди.
Бразилиялик футболчи 43,6 миллион еврога оид можарони давом эттирмоқда, ушбу маблағ унга «Барселона» билан шартнома имзолагани учун берилиши керак эди. Неймар ПСЖга ўтиб кетганига қарамай, сумманинг охирги евросигача ундириб олмоқчи. Ёзда суд клуб фойдасига қарор чиқариб, ҳатто Неймарнинг «Барселона»га 7,6 миллион тўлаши кераклигини белгилаганди. Аммо эндиликда футболчи ва унинг атрофидагилар қарор юзасидан апелляция бериш ҳуқуқидан фойдаланмоқда. Месси борасида эса ҳеч қандай жанжал йўқ, балки мажбуриятлар бор, чунки аргентиналик футболчи 2017 йилда имзолаган шартномаси асосида клубга бўлган садоқати учун бонусга эга бўлиши керак. У маблағнинг бир қисмини февраль ойида олганди, келаси ёзда эса клуб унга яна 33 миллион евро ажратиши керак бўлади.
Тозалаш ишларининг иккинчи босқичи
«Барса» катта эҳтимол билан қишда янги футболчиларсиз қолиб кетиши мумкин. Гарчи клуб ҳозирда бир қатор футболчилар билан хайрлашиб, янги ўйинчиларни сотиб олишни режалаштираётган бўлса-да, бу ёздаги тозалаш ишларини эслатиб юбормоқда, холос. Ўшанда жамоа Видаль, Ракитич, Суарес сингари футболчиларни рамзий суммалар ёки бепулга қўйиб юборди. Шунингдек, «Ювентус» билан айёрона алмашинув амалга оширилди.
Қишда жамоани тарк этадиганларнинг ҳам янги рўйхати тузилган. Улардан биринчиси, ижарадан қайтганидан бери деярли ўйнамаётган Карлос Аленья. Иккинчиси эса Хуниор Фирпо. Унинг Хорди Альбага ўринбосар бўлиши кутилганди, бироқ ундай бўлмади. Шунингдек, ҳар иккала қанотда ҳам бемалол ўйнай оладиган Сержиньо Дест трансферидан сўнг Фирпо захирага «михланди». Аслида Фирпонинг трансфери аввалбошидан кўпчиликда шубҳа уйғотганди, боиси унинг собиқ жамоаси «Бетис» уч нафар марказий ҳимоячи билан ўйнарди. Агар Фирпо бошқа жамоага сотилса, мураббийлар штаби унинг ўрнига «Барселона Б»да ишончли ўйин кўрсатиб келаётган 17 ёшли Алехандро Бальдени жалб қилмоқчи.
Яна бир самарасиз трансфер, бу Мартин Брэйтуэйтнинг «Леганес»дан 18 миллион еврога фавқулодда сотиб олингани бўлди. Даниялик футболчи жароҳат олган Суаресни вақтинча алмаштириши керак эди, аммо шу орада уч ойлик карантин жорий этилди, чемпионатлар қайта тикланганидан сўнг эса уругвайлик футболчи аллақачон сафга қайтиб бўлганди.
Ва ниҳоят «Барса» мухлислари учун энг оғриқли мавзу – Рики Пучнинг таркибдан тушиб қолаётгани. Ёзда Кике Сетьен сўнгги йиллардаги клуб академиясининг энг иқтидорли битирувчиси ҳисобланган ярим ҳимоячига ишонч билдирди, ўз ўрнида Пуч ҳам томошабинларни ўзига мафтун эта олди. Бироқ Роналд Куман келиши билан Пуч унинг режаларига кирмаслигини маълум қилди ва унга ижарага кетишни маслаҳат берди. Ҳозирда у деярли ўйин амалиётига эга бўлмаяпти. Нидерландиялик мураббийнинг танқидчилари бундан ғазабланмоқда, аммо Куман шу пайтгача Педри ва Тринкаудан унумли фойдаланаётгани учун уни ёшларга нисбатан ишончсизликда айблаб бўлмайди. Пуч эса катта эҳтимол билан вақтинча клубини алмаштиради.
Жамоани кучайтириши мумкин бўлган уч номзод
Бу ерда юқорида айтиб ўтилган ўйинчилар билан хайрлашиш истаги пулни тежаш учун арзимаган истак эканлигини ва буларнинг барчаси бош мураббийнинг хоҳишига кўра амалга ошираётганлигини англаш мумкин. Бундан ташқари, ҳозирги муаммолар Ансу Фатининг жароҳати туфайли яна-да кучайди. Ёш футболчи операция қилинди ва энди у тўрт ой давомида майдонга туша олмайди. Усмон Дембеле эса ҳамон эски Дембелелигича қолмоқда. Тўғри, франциялик футболчи ниҳоят соғлом бўлиб, бир қатор сифатли ўйинларни ўтказди, аммо барибир фақат унга ишониб қолиш тўғри қарор бўлмайди. Бунинг устига унинг клубдаги ҳолати мураккаб тус олган. Клуб юқори маош олувчи «биллур оёқ» соҳибидан қутулишни истаётган бўлса, Куман уни жамоада олиб қолмоқчи. Ҳозирда футболчига «Манчестер Юнайтед» қизиқиш билдирмоқда. Унинг клуб билан шартномаси эса 2022 йилнинг ёзида ўз якунига етади.
Потенциал янги келадиганлар ҳақида гап кетадиган бўлса, «Барса» биринчи навбатда марказий ҳимоячига муҳтож, чунки идеал тандем ҳисобланмайдиган Пике–Лангле жуфтлиги жамоанинг ягона альтернативидир. Айнан шу туфайли Фрэнки де Ёнг пастроқ тушиб ўйнашга мажбур бўлмоқда. «Кўк-анорранглилар» ҳозирда «Манчестер Сити»нинг қишда Эрик Гарсияни арзонроққа беради деб умид қилмоқда. Боиси клубда бошқа вариант ҳам, маблағ ҳам йўқ.
Ва, албатта, ҳозирда икки нидерландиялик футболчи Депай ва Вейналдум жамоанинг асосий трансфер мақсади бўлиб турибди. Мемфис Куманнинг севимли футболчиси ҳисобланади. Унинг кутилган ўйинни намойиш эта олмаган Гризманнинг ўрнини тўлдириши кутилмоқда. Вейналдум билан боғлиқ вазият ҳам анча қизиқ бўлиб, мавсум бошланишидан олдин Юрген Клопп ярим ҳимоячини «Энфилд»да қолишга ишонтирди, аммо «Ливерпуль» ҳанузгача унга янги шартнома таклиф қилмаяпти, табиийки, бу футболчининг норозилигига сабаб бўлмоқда. Жамоа ҳеч бўлмаганда «Лион» билан янги келишувдан бош тортган Депайни олиб келиш учун ҳам ўз меъёрлари бўйича камтарона миқдордаги суммани топиши керак, аммо ҳозирча эски қарзлар клубни жарликка тортишда давом этмоқда...
Изоҳ (0)