Жиззах вилоятида 18–19 ноябрь кунлари ёғган қор сабаб йўлнинг сирпанчиқ ҳолатга келганлиги сабабли икки йўл-транспорт ҳодисаси содир бўлди, дея хабар бермоқда ЙҲХББ.
Маълум қилинишича, 2020 йил 20 ноябрь куни соат 7:30 ларда Шароф Рашидов туманидан ўтган Қўқон–Жиззах автомобиль йўлининг 286-километрида Damas ҳайдовчиси бошқарувни йўқотиб қарама-қарши томонидан ҳаракатланиб келаётган «КамАЗ» юк машинаси билан тўқнашган.
Оқибатда 1966 йилда туғилган Damas ҳайдовчиси вафот этган. Ҳайдовчининг бошқарувни йўқотишига 18–19 ноябрь куни ёғган қор натижасида юзага келган йўлнинг сирпанчиқ ҳолати сабаб бўлган.
Шунга ўхшаш ҳолат Зомин туманида ҳам содир бўлган.Қайд этилишича, 2020 йилнинг 18 ноябрь соат 16:30 ларда Зомин туманидан ўтувчи 4К-241 Зарбдор–Аччиқ–Қорамозор автомобиль йўлининг 9-километрида 1993 йилда туғилган ҳайдовчи Баҳодир Тўғонов бошқарувидаги Nexia қарама-қарши йўналишда келаётган 2002 йилда туғилган Пардабоев Сардор бошқарувида бўлган Nexia-2 автомашинаси билан тўқнашган.
Оқибатда Сардор Пардабоев бошқарувидаги Nexia-2 машинасида йўловчи сифатида келаётган ҳайдовчининг 1968 йилда туғилган отаси тан жароҳати олиб шифохонада вафот этган. Nexia ҳайдовчиси Баҳодир Тўғонов эса тан жароҳати олиб шифохонага ётқизилган.
Ушбу ЙТҲга ҳам қор ёғиши оқибатида йўлнинг ҳаракат қисмида сирпанчиқ ҳосил бўлгани сабаб бўлгани аниқланган.
Аввалроқ Андижонда тезликни оширган Spark ҳайдовчиси она-бола пиёданинг ўлимига сабабчи бўлгани, Попда Lacetti’нинг Damas’га урилиши оқибатида бир киши вафот этгани ҳамда Бухорода Lacetti йўлни кесиб ўтаётган ота-болани уриб кетгани ҳақида хабар берилганди.
Изоҳ (0)