Россияда ўтган бир сутка ичида коронавирусга чалиниш билан боғлиқ 24 822 та янги ҳолат қайд этилди, деб хабар берди Meduza. Бу касалланганлар сони суткалик ортиши бўйича янги антирекорд. Ундан бир кун олдин бир сутка ичида 24 318 кишида COVID-19 тасдиқланган эди.
Бутун мамлакат бўйлаб пандемия бошланганидан буён коронавирусга чалинганлар сони 2 064 748 кишига етган.
Энг кўп касалланиш ҳолатлари Москва (суткасига 7168 та) ва Санкт-Петербург (2476 та) шаҳарларида кузатилган.
Сўнгги бир кеча-кундузда инфекциядан 467 киши, пандемия бошланганидан буён эса 35 778 киши вафот этган. Бундан бир кун аввал 463 киши вафот этиб, COVID-19’дан сутка давомида ўлим ҳолатлари бўйича антирекорд бўлганди.
Соғайганлар сони 1 577 435 нафарни ташкил этмоқда, шулардан 26 021 нафари сўнгги суткада тузалиб чиққан.
«Роспотребнадзор» маълумотларига кўра, мамлакатда коронавирусни аниқлаш бўйича сўнгги 24 соат ичида 588 мингта, умумий ҳисобда эса 71,8 миллионтадан ортиқ тест ўтказилган.
Изоҳ (0)