АҚШда амалий ташриф билан бўлиб турган Ўзбекистон ташқи ишлар вазири Абдулазиз Комилов 19 ноябрь куни ўзбекистонлик Саидаҳмад Арслановга «Шуҳрат» медали ва элчихонанинг биринчи котиби Фахриддин Мўминовга «Меҳр-саховат» кўкрак нишонини тантанали равишда топширди. Бу ҳақда Ўзбекистоннинг Вашингтондаги элчихонасига таяниб, «Халқ сўзи Online» хабар берди.
Ўзбекистон Президенти Шавкат Мирзиёевнинг 2020 йил 27 августдаги фармонига биноан Саидаҳмад Арсланов мамлакат мустақиллигини мустаҳкамлаш, унинг иқтисодий салоҳиятини ошириш, ёш авлодни ватанга муҳаббат руҳида тарбиялашга қўшган муносиб ҳиссаси, мустақиллик ғояларига садоқати, фидокорона меҳнати, ватанпарварлиги, жамоат ҳаётида фаол иштирок этиш орқали қўлга киритилган шараф ва ҳурмат учун «Шуҳрат» медали билан тақдирланган эди.
Ахборот технологияларига ихтисослашган АSО Systems компанияси президенти Саидаҳмад Арсланов 18 йилдан ортиқ вақт давомида АҚШда яшаб келади. У икки томонлама сиёсий, иқтисодий ва маданий алоқаларни мустаҳкамлашда ҳамда турли хайрия тадбирларини ўтказишда Ўзбекистон дипломатик ваколатхоналари билан доимий равишда ҳамкорлик қилиб келмоқда.
Хусусан, у 2019 йил 22 декабрь куни ўтказилган Ўзбекистон Олий Мажлиси Қонунчилик палатаси сайловига АҚШда тайёргарлик кўриш ва уни ўтказишда фаол иштирок этди. Шунингдек, 2020 йил апрель ойида Ўзбекистоннинг АҚШдаги элчихонаси ва Бош консулхонаси ҳамда Америка қитъаси мамлакатларидаги диаспора ташкилотлари ҳамкорлигида ташкил этилган «Биз Ўзбекистонга бефарқ эмасмиз» хайрия акциясининг бош координатори бўлди.
Пандемия даврида АҚШ ва Канададаги ватандошлар 100 минг доллардан кўпроқ пул йиғди. С.Арсланов ва бошқа ватандошларнинг фаол ёрдами билан ушбу маблағлар эвазига Қашқадарё ва Сурхондарё вилоятларида коронавирусга чалинган беморларни даволаш учун 350 та кислород концентрати ва 200 та пульсоксиметр сотиб олинди.
Шунингдек, у АҚШда Ўзбекистондаги кўмакка муҳтож фуқароларга ёрдам бериш учун ташкил этилган Give to Get International Inc хайрия фондининг фаол аъзоларидан бири ҳисобланади.
Ҳозир Саидаҳмад Арсланов Ўзбекистон инновацион ривожланиш вазирлиги, шунингдек, IT Park билан ҳамкорликда республикамизда ахборот технологиялари соҳасида АҚШда тан олинадиган сертификатлар беришни жорий этиш лойиҳаси устида ишламоқда.
С.Арсланов Президент Шавкат Мирзиёевга юксак мукофот учун миннатдорлик билдириб, Ўзбекистоннинг Вашингтондаги элчихонаси, Нью-Йоркдаги Бош консулхонаси, АҚШ ва Канададаги ўзбек диаспора ташкилотлари томонидан ўтказилган «Биз Ўзбекистонга бефарқ эмасмиз» хайрия акциясини ушбу мамлакатлардаги ватандошларимизни жипслаштирганини таъкидлади.
Мавзуга доир: Абдулазиз Комилов диний эркинликларни илгари суриш бўйича вазирлар конференциясида иштирок этди
Ўзбекистон халқи ва Президенти менинг тимсолимда ўзбек халқининг тақдири ва соғлиғига бефарқ бўлмаган АҚШ ва Канададаги ватандошларимиз ҳамда дўстларимизнинг камтарона ҳиссасини юқори баҳолади. Шу муносабат билан давлатимиз раҳбари ва Ўзбекистон халқига АҚШ ва Канададаги барча ватандошларимиз ва дўстларимиз номидан мени «Шуҳрат» медали билан тақдирлагани учун миннатдорлик билдираман», – деди Саидаҳмад Арсланов.
Аввалроқ Абдулазиз Комилов Пентагон раҳбари вазифасини бажарувчи Кристофер Миллер билан учрашгани ҳақида хабар берилганди.
Изоҳ (0)