Футбол бўйича Миллатлар Лигасининг 5-тур ўйинлари ортда қолди. Сўнгги тур олдидан бир қатор гуруҳларда кейинги босқичга йўл олган ёки қуйи лигага тушиб кетган жамоалар номи маълум бўлди.
А1 гуруҳи. Босния ва Герсеговина (2 очко) Б лигага равона бўлди. Италия (9) сўнгги турда Боснияни мағлуб этадиган бўлса, Нидерландия (8) ва Польша (7) ортда қолдириб ярим финалга йўл олади.
А2 гуруҳи. Исландия (0) Данияга (10) енгилгач юқори лигада жон сақлаб қолиш имкониятини йўққа чиқарди. Англия (7) эса ярим финал йўлланмасидан қуруқ қолди. Кейинги босқич масаласи сўнгги тур доирасидаги Дания — Бельгия (12) учрашувида ҳал бўлади.
А3 гуруҳи. Франция (13) терма жамоаси Португалия (10) майдонида ғалаба қозонган ҳолда ярим финал йўлланмасини муддатидан аввал қўлга киритди. Хорватия (3) ва Швеция (3) жон сақлаб қолиш учун курашмоқда.
А4 гуруҳи. Сўнгги турда Германия (9) ва Испания (8) ярим финал йўлланмаси тақдирини ҳал қиладиган баҳсда майдонга тушади. Украина (6) ва Швейцария (3) эса лига қолиш учун кураш олиб боради.
Б3 гуруҳи. Россия (8) сўнгги турда Сербия (3) майдонига сафар қилади. Бу ўйиндаги ғалаба русларни А Лигага олиб чиқади. Венгрия (8) ва Туркия (6) эса ўзаро ўйинда муваффақият қозониш билан бирга Россиянинг очко йўқотишини кутади.
Б4 гуруҳи. Кейинги босқич масаласи сўнгги турдаги Уэльс (13) ва Финляндия (12) ўйинида ҳал бўлади.
C4 гуруҳи. Беларусь (10) ва Албания (8) сўнгги турда биринчи ўрин масаласини ҳал қилса, Қозоғистон (4) ва Литва (5) жамоалари ўртасидаги ўйиндан кейин энг қуйи лигага равона бўладиган жамоа номи маълум бўлади.
Барча гуруҳлардаги ҳолат билан УЕФА расмий сайтида танишиш мумкин — ҳавола.
Маълумот учун, Миллатлар Лигаси регламентига кўра, энг юқори лига (А Лигаси) гуруҳларида биринчи ўринни қўлга киритган жамоалар мусобақа ярим финалига йўл олади. Қолган гуруҳлардаги биринчи ўрин эгалари эса ўзидан битта юқори лигага кўтарилади ва мусобақанинг кейинги мавсумида ўша ерда тўп суради. Гуруҳларда сўнгги ўринни эгаллаган жамоалар эса битта қуйи лигага тушиб кетади.
Янада кўпроқ футбол ва спорт янгиликларидан бохабар бўлишни истасангиз, «Дарё»нинг Telegram’даги расмий спорт канали — @Daryo_Sport24’га обуна бўлинг!
Изоҳ (0)