Бельгия ҳукумати мамлакатдаги коронавирусга қарши чекловларни маҳаллий Санта-Клаус – Синтерклаас ва Пер-Ноэл учун юмшатишга қарор қилди. Бу ҳақда Meduza хабар берди.
Бельгия соғлиқни сақлаш вазири Франк Ванденбрук Синтерклаасга хат ёзиб, у Бельгияга етиб келганидан кейин карантинни 10 кунга юмшатиш зарурлигини маълум қилди. Вазирнинг таъкидлашича, эҳтимол, Синтерклаас Испаниядан қиладиган сафар 17 кун давом этади. Бу эса белгиланган карантин муддатидан узоқ.
Шунингдек, Ванденбрук Бельгияда комендантлик соати жорий этилганини, бошқа нарсалар қаторида Синтерклаас болаларга совға топширадиган 2020 йил 6 декабрга ўтар кечаси ҳам иш олиб боришини таъкидлайди. Аммо вазир ушбу чеклов Бельгия Санта-Клаусларига татбиқ этилмаслигига ваъда берди. Акс ҳолда улар ўз вазифаларини бажара олмайди. «Сиз болаларнинг кўнгли қолишини хоҳламайсиз. Биз ҳам буни истамаймиз», − дейилади мактубда.
«Сиз скафандрда томдан томга ўтишингиз шарт эмас. Аммо биз сизга доимо масофа сақлашни, қўлларни мунтазам ювиб туришни ва агар керак бўлса ниқоб кийишни ҳам маслаҳат берамиз», − дея қўшимча қилади вазир.
Вазир Синтерклаасга бу йилги мурожаатида Бельгияда болалар алоҳида жасорат кўрсатганлигини таъкидлади. Пандемия туфайли уларнинг ҳаёти ўзгарди: улар энди дўстларини аввалгидек кўролмайди, севимли машғулотига боролмайди, бобо ва бувисиникига ташриф буюра олмайди. Шунинг учун ҳам ҳар бир бола Синтерклаас томонидан илгарилари берилмаган совғаларга лойиқлигини алоҳида таъкидлаб ўтган.
Изоҳ (0)