Ушбу ҳафтада Green Card рўйхатидан ўтиш муҳлати тугаши биланоқ юртимизда ватанпарварликни кучайтиришга оид ҳужжат тарқалди. Ўқувчилар дарсдан олдин мадҳия куйлайди, танаффусда ватан мавзусидаги шеър ва қўшиқлар эшитади.
2 ноябрь санаси билан имзоланган хат тизимнинг 14 та ҳудуддаги масъул раҳбарларига йўлланган. Бундай топшириқ берилишига Президент Администрациясининг 23 октябрдаги йиғилиши баёни асос бўлган. ХТВ ўринбосарининг айтишича, умумтаълим муассасаларида мадҳияни куйлаш, қўшиқ ва шеърларни эшиттириш ўқувчиларни ватанпарварлик руҳида тарбиялашда муҳим омил бўлиб хизмат қилади. Танаффус вақтида ватан ҳақидаги қўшиқ ва шеърлар таълим муассасаларининг имкониятидан келиб чиқиб, радио тармоғи ёки овоз кучайтиргич орқали эшиттирилади.
«‘Янгича Ўзбекистон – янгича дунёқараш’ тарғибот-ташвиқот тадбирларида ўзбек адабиётининг намояндалари – Чўлпон, Фитрат, Ойбек, Ҳамид Олимжон, Миртемир, Зулфия, Эркин Воҳидов, Абдулла Орипов ва бошқа ёзувчи, шоирларнинг ижод намуналарини эшиттириш тавсия этилиши қайд этилган. Рўйхатда 50 нафар ижодкорнинг шеърлари ўрин олган. Эшиттириладиган қўшиқлар рўйхатида эса 41 нафар хонанданинг шунча миқдордаги ижод намунаси келтирилган», – дейди вазир ўринбосари.
* * *
Аммо, лекин, бироқ ватанпарварлик тарғиботи қанчалик кучайтирилмасин, ватанни юракдан севишга ўргатиш мураккаблашмоқда. Хусусан, расмий ТВ ибораси билан айтганда, «вазифасига панжа орасидан қаровчи» мулозимлар ватанни чўнтакдан севишга ружу қўймоқда. Айниқса, давлат чўнтаги жуда ҳам кенг бўлиб, унга истаганча қўл тиқиб, Malibu, Equinox, Trailblazer, Tahoe каби машиналар сотиб олса бўлади. Гап сўнгги кунларда муҳокама мавзусига айланган давлат харидлари ҳақида кетмоқда.
Ўзи кечагина ташкил қилинган Пиллачилик ва қоракўлчиликни ривожлантириш қўмитаси 795 миллион сўмга битта Tahoe, 635,5 миллион сўмга иккита Malibu ҳамда 115,6 миллион сўмга Lacetti харид қилган. Бунинг учун жами 1,5 миллиард сўм кетган. Аввалроқ Маданият вазирлиги энг қиммат конфигурацияли иккита Malibu 2 олганди. Аввалги машиналари эскириб қолган экан. Келинг, энди Зарбдор тумани ҳокимлигига зарбани йўналтирамиз: улар Captiva хизмат машинаси бўла туриб, 370 миллион сўмга Trailblazer сотиб олган.
Аммо жамоатчилик фикри тўхтаб қолгани йўқ. Давлат активларини бошқариш агентлиги жамоатчилик таъсири остида Trailblazer сотиб олиш фикридан қайтди.
Коррупцияга қарши курашиш агентлиги директори Акмал Бурҳонов қиммат нархлардаги хизмат автотранспортларини харид қилинаётганига муносабат билдирди. Унинг айтишича, туман ҳокимларига нархи 267,5 миллион сўмдан юқори хизмат автомобили сотиб олиш тақиқланиши мумкин.
Транспортга оид яна бир хабар. Мобил телефонга олинган йўллардаги қоидабузарликлар эндиликда видеорегистраторлар билан тенглаштирилади ва Маъмурий жавобгарлик тўғрисидаги кодексда белгиланган тартибда кўриб чиқилади.
* * *
Мамлакат президенти бу ҳафта Қашқадарёда борди. Президентни қаршиликлар манзарали чимларни яшил рангга бўяб кутиб олди. Шавкат Мирзиёев комбинат, клиника, қурилиш мавзеларида бўлди. Бироқ Қашқадарёдаги нутқларида танқидий мазмун кўпроқ учради. Президент, хусусан, Қашқадарё мамлакатнинг кўпгина ҳудудларидан орқадалигини тилга олди.
«Аҳоли жон бошига ялпи ҳудудий маҳсулот мамлакатимиздаги энг паст кўрсаткичлардан бири. Қашқадарё эли шунга муносибми?» деб савол қўйди у. Вилоят ҳокими ўринбосарини ишдан олиб ташлади. Шунингдек, Қашқадарёнинг мева-сабзавот экспортига паст баҳо берди. Қашқадарёнинг эски ҳокими Зафар Рўзиев номига танқидларни аямади, уни бошқарувга қўйганини хато деб тан олди. Қашқадарё ерлари, гарчи, кўп сув олса-да, унумдорлик пастлигини таъкидлаб, сувга масъулларни ишдан олишни буюрди.
* * *
Талабаларга бу ҳафта қувончли ва... бироз ташвишли хабар келтирди. Талабалар 16 ноябрдан анъанавий таълим шаклига қайтади.
Аслида бу кутилган эди, бироқ бунчалик тез эълон қилиниши талабаларни шошириб қўйди, қолаверса, олий таълим муассасасининг барча талабани бирданига қабул қилиш имконияти ҳам йўқлиги сир эмас. Турар жой муаммоси бор. Шунинг учун Олий таълим вазирлиги 14 ноябрдаги брифингда агар талабаларда имконият бўлмаса, ўқишни масофадан туриб давом эттириши мумкинлигини илова қилди. Турар жой масаласини ҳал қилган талабалар эса бемалол келиб ўқийверади.
* * *
Бу ҳафта Сенат раисаси Танзила Норбоеванинг турли мавзулардаги фикрлари жамоатчилик муҳокамасини келтириб чиқарди. Норбоева 12 ноябрь куни бўлган матбуот анжуманидаги фикрлари давомида аёллар масаласига тўхталиб, мамлакатда учраб турувчи «қиз ўғирлаш» одатини танқид қилди. Қизларни мажбурлаб турмушга беришга ҳеч ким ҳақли эмаслигини таъкидлади.
Бундан ташқари, жинсий тарбия масаласида сўз очилганида «мактабгача таълимда ёшга мос қилиб, ўзини доирасида, юқори синфларда ва олий таълим муассасаларида қизлар ва ўғил болаларни оилага тайёрлаш, репродуктив саломатлик, туғиш, сақланиш, қариндош уруғлик никоҳлари ва бошқалар тўғрисида очиқдан-очиқ маълумотларни беришимиз керак», деди.
Шунингдек, Танзила Норбоева Гулнора Каримованинг қамоқда сақланишига аёл сифатида муносабати қандай экани ҳақидаги саволга жавоб берди.
«Гендер тенглиги ҳақида гапиряпмиз — аёлми, эркакми, жиноят қилса, тенг жавоб бериши керак», — деди у.
* * *
Анчадан бери чиқмай қўйган фош қилувчи аудиоёзувлар бу ҳафта яна тарқалди. Улар Андижон вилоятининг аудиоёзувлари билан эскитдан таниқли ҳокими Шуҳратбек Абдураҳмоновга тегишлидир. Ҳоким жаноблари аудиода унга «сассиқ гапирган» уч нафар марҳаматлик аёлни 15 суткага қаматиб қўйганини таҳдид билан гапиради. «Қичиқ» савол берадиган журналистларни «қўйворишидан» огоҳлантиради.
Бу аудио тарқалиб, доимгидек жамоатчиликнинг қизғин танқидига учрагач, вилоят ҳокимлиги булар икки йил олдинги гаплар эканлигини маълум қилди. Депутат Расул Кушербоев «у Ленин сабаб бошланган бошқарув мактабининг содиқ вориси бўлиб, вакиллик, суд органлари устидан амалда мутлақ ҳокимият ўрнатиб олган феодал замонига мос инсонлиги»ни қайд этди.
Дайжестимизга тўплаганларимиз, ҳозирча, шулардан иборат. Соғ ва саломат бўлинг, «Дарё»да қолинг.
Изоҳ (0)