Қорақалпоғистоннинг Мўйноқ, Тахтакўпир ва Қораўзак туманларида доимий яшайдиган ва 2020/2021-ўқув йили тест синовларидан ўтолмаган абитуриентлар ўқишга қўшимча қабул қилинади, дея хабар берди ЎзА.
Энг камида 56,7 балл тўплаган абитуриентгина Қорақалпоғистондаги ОТМларга қўшимча квота асосида ўқишга қабул қилинади.
Эслатиб ўтамиз, Шавкат Мирзиёев 2 октябрь куни Қорақалпоғистонга сафари давомида ушбу туманлардаги ёшларни ОТМларга қамраб олиш юзасидан топшириқ берганди.
Қайд этилишича, қўшимча квоталар тиббиёт йўналишига ажратилмаган. Бошқа йўналишга ҳужжат топширган абитуриентлар ўқишга тўлов-шартнома асосида қабул қилинади.
Абитуриентлар ўқишни тугатгандан кейин Мўйноқ, Тахтакўпир ва Қораўзак туманларида камида 5 йил ишлаб бериши керак.
13 ноябрдан бошлаб ўқишга хоҳиш билдирган абитуриентлар ва уларнинг ота-оналари билан учрашувлар ташкил қилинади. Учрашувлар 3 та туманда 4 та сектор раҳбарлари ҳамда олий ўқув юртлари вакиллари томонидан ташкил этилади.
Изоҳ (0)