Халқаро пресс-клуб раиси ҳамда Журналистика ва оммавий коммуникациялар университети ректори Шерзодхон Қудратхўжаев коррупция масалаларига оид катта тадбирларни йилда тўрт марта ўтказиш таклифини билдирди, дея хабар бермоқда «Дарё» мухбири Миролим Исажонов.
Бош прокуратурада 7 ноябрь куни ўтказилган идоралараро йиғилишда қатнашган Қудратхўжаев коррупцияга қарши курашда парламент ва сенат вакиллари кучли бўлиши кераклигини таъкидлади.
«Бош прокуратурага илгари кўп келганмиз, бу каби йиғилишлар бошқача ўтарди, уч соатлик монологлар ўқиларди. Бугунги тадбир эса таҳлилий-танқидий руҳда бўлди. Журналистларнинг ҳам иштирок этаётгани, албатта, қувонарли ҳолат.
Шу ўринда айтиш керакки, қачонки парламент ва сенатнинг қуйи поғонаси кучли бўлса, депутатлар ижро ҳокимиятни жиловласа, коррупцион ҳолатлар шунча камаяди. Бундан ташқари, йилига тўрт марта бугунгидек чуқур таҳлилий катта тадбир ўтказилишини таклиф қилардим. Халқаро пресс-клуб эса майдон беришга рози», — деди Шерзодхон Қудратхўжаев.
Унинг таъкидлашича, бозорлардаги пуллик автотураргоҳларга кириб-чиқиш тартибини тўғри йўлга қўйиш зарур.
«Бугунги йиғилишда бозорлар ҳақида жуда тўғри фикрлар айтилди. Мен бир нарсага ҳайрон қоламан: Makro, Korzinka сингари кўп қаватли савдо дўконларига борсангиз, автотураргоҳлар бепул эканлигига гувоҳ бўласиз. Ваҳоланки, уларнинг қурилиши учун катта миқдорда маблағ сарфланади. Аммо кичкинагина бозорга кирсангиз, қора ‘будкаъга иккитаси ўтириб олади, юзи ҳам кўринмайди. Фақат қўли чиқади ва пулингизни олади. На чек беради ёки берган чеки ҳам сохта бўлиб чиқади. Қаранг, коррупция ўзи шу кўринишда бозорлардан бошланади.
Катта-катта савдо дўконларига текинга кирамиз. Бозорларга кўп аҳоли киради, камида 300-400 минг сўмлик нарса харид қилади. Лекин нима учун бозорларда машинангизни қўйганингиз учун ҳақ олишади? Бозорларга кириш-чиқиш тартибини жойига келтиришимиз керак», — деди Қудратхўжаев.
Изоҳ (0)