Бошқалар нима дейишини ўйлаш, ўтмишни унутолмаслик. Ўзига бўлган ишончни синдирувчи сабаблар

Ўзига бўлган ишончи юқори бўлган кишиларга ҳамма ҳавас қилади. Бир қарашда улар ҳамма нарсага эришиши ва иложини топишига ўзига бўлган ишонч сабаб, деган фикрга борилади. Аслида эса ўзига юқори баҳо берадиган кишилар қандай эмоция ва фикрлашдан қочиш, нима қилиш ёки қилмаслик кераклигини билади.

Таққослаш

Болаликдан атрофидагилар билан ўзимизни таққослаш одатий ҳол бўлиб қолган. Бунга ота-онанинг фалончининг қизи ёки ўғлини, синф ўқитувчисининг аълочи ўқувчини намуна қилиб кўрсатиши сабабдир балки, ким билсин?! Аммо сиз бошқасиз, кимгадир ўхшашингиз керак эмас. Кимдандир илҳомланган, яхши томонларини ўрганган яхши, лекин тақлид қилиб, ўзликни йўқотиб қўймаслик, бунинг ўрнига ўзингизнинг энг яхши версиянгиз бўлишга интилиш керак. Бу учун ўзига нисбатан холис баҳо беришни ўрганиш: кучли ва кучсиз томонларини билиш ва тан олиш керак. Таққосланг, фақат кечаги ва бугунги ўзингизни. Кечагидан кўпроқ нимага эришдингиз, йўқотдингиз ва бунга феъл-атвор ва сиз билан боғлиқ қандай хусусиятлар сабаб бўлди, мулоҳаза қилиб кўриш керак. Солиштирганда кечагидан яхшироқ эканингизни билиш учун шунга яраша ҳаракат қилиш ва ўз устида ишлаш керак. Ўз устингизда ишлаш давомида бошқалар ҳақида ўйлаш ва таққослашга вақтингиз қолмайди.

Ўтмишдаги хатолар

Ўтмишдаги янглиш қилинган ишлар, йўқотишларга кўникиш ва шунга қарамай, синмасдан йўлда давом этиш ва юқори чўққиларни кўзлаш учун ҳаддан ортиқ куч керак. Асосийси, шу кучни топа олиб, келажакдаги ютуқларга эътибор қаратиш ва омадсизликлар сизни ярим йўлда тўхтатишига йўл қўйиб бермаслик керак.

Тайёргарлик кўрмаслик

Ҳар бир кун келажакдаги ғалабаларга эришиш учун янги имкон. Ғолиблардек яшаш ва ҳаёт кечириш учун ғолиблардек фикрлашни билиш керак. Унутманг, чемпионлар тинимсиз меҳнати, руҳий иродаси ва қийинчиликдан қочмаганининг эвазига ҳам ғалабани қўлга киритади. Натижага эришиш учун комфорт зонадан чиқинг, қийинчилик ва ноқулайликларни енгишга ҳаракат қилинг. Эртанги ғалаба учун бугундан ҳаракат қилинг. Қачонки етарли кўникма ва тажрибага эга бўлсангиз, ўзингизга бўлган ишонч тобора ортиб боради.

Қўрқув

Бошқалар нима дейишини ўйлаш мақсад ва орзуларга эришишга халақит берадиган энг катта тўсиқ ҳисобланади. Ҳеч қачон сиз учун керак ва асосий нарсалардан сизнинг ҳаётингизда роли бўлмаган инсонларнинг субъектив муҳокамаси учун қўрқувни ҳис қилиб, воз кеча кўрманг. Сиз ишонган ва умид қилган нарса қўрқув ва ваҳималардан муҳим бўлсин.

Негатив фикрлаш

Иложсиз нарсанинг ўзи йўқлигини ёддан чиқарманг. Сиз истаган нарсага эришиш учун имкониятлар чексиз бўлиши, шунчаки сиз биргина ечимни кўраётган бўлишингиз мумкин. Сизни тушкунликка туширадиган ва иложсиздек ҳис қилишга мажбур қиладиган фикрларни миянгиздан чиқариб ташланг. Тўғри ва ижобий фикрлашни ўрганинг. Ҳар қандай фикрлар моддийлашиши мумкинлигини, ўй ва ҳаёллар нафақат кайфиятга, балки келажакка ҳам таъсир қилишини ёддан чиқарманг.