Катрина Каиф ҳинд кинематографиясининг истеъдодли актрисалари орасида етакчи ўринни эгаллайди. Шунингдек, машҳурлиги йилдан йилга ортиб бораётган Катрина ҳақиқатан ҳам ажойиб раққоса, маҳоратли актриса ва гўзал моделдир.
Катрина Каиф Гонконгда ҳиндистонлик Муҳаммад Каиф ва инглиз миллатига мансуб Сюзанна Тюркотт оиласида туғилган. Актрисанинг 6 синглиси ва укаси бор. Унинг отаси тадбиркор, онаси ҳуқуқшунос бўлиб, хайрия ишлари билан ҳам шуғулланган. Катрина ўз карьерасини 14 ёшида модель сифатида бошлаган ва ушбу соҳада катта натижаларга эришган.
У Лондондаги мода намойишларида режиссёр Кайзад Густад эътиборига тушган. Режиссёр моделни инглиз-ҳинд фильмида рол ўйнашга таклиф қилган. Аммо унинг кинодаги илк дебюти муваффақиятга эришмаган.
Шундай бўлишига қарамай, Катрина Ҳиндистонда қолишга қарор қилади. Сабаби бетакрор гўзаллик соҳибасига бошқа лойиҳалар учун ҳам таклиф тушиб турган эди. Кейинчалик унга «Мен қандай севардим», «Пойга» каби картиналар машҳурлик келтирди. Шундан сўнг актриса ўз устида ишлашда давом этди ва у ҳозирда энг талабгор актрисалардан бирига айланган.
Аммо юлдузнинг шахсий ҳаётидаги муносабатлар унчалик ҳам омадли кечмади. 2003–2010 йиллар мобайнида Катрина Салмон Хон билан яқин муносабатда бўлган.
Актрисанинг сўзларига кўра, бу унинг ҳаётидаги энг жиддий муносабатлардан биридир. Салмон актрисани ижоднинг машаққатли йўлида қўллаб-қувватлаган. Аммо ушбу севги ҳикояси Болливуд киноси каби якун топмаган, жуфтлик ажрашишга қарор қилган. Маълумотларга кўра, актёр унга турмуш қуриш таклифини билдирган, аммо Катрина буни рад этган. Балки ўша пайтда Катрина шон-шуҳратни оиладан кўра устун ҳисоблагандир.
Аммо булар аслида ҳақиқатми ёки йўқлиги ҳанузгача сир. Актриса Салмон билан муносабатларини тўхтатмасдан аввал Ранбир Капур билан «Ғалати севгининг ажойиб ҳикояси» картинасида рол ижро этган. Эҳтимол, бу ҳам уларнинг айрилиғига сабаб бўлган бўлиши мумкин. Аммо жуфтлик 2013 йилга қадар бу ҳақда ҳеч қандай маълумот бермаган. Орадан уч йил ўтгандан сўнггина улар ажрашишларини эълон қилган.
Ўшандан буён Катринанинг ҳаётида бу каби муносабатлар такрорланмади. Унинг сўзларига кўра, у бу борада жиддий ва мустаҳкам муносабатларни орзу қилмоқда. Демак, у ҳалигача орзусидаги инсонни учратмаган.
Изоҳ (0)