Самарқанд вилоятида Damas автомобили велосипедчини уриб юборди, дея хабар бермоқда вилоят ЙҲХБ.
Қайд этилишича, Самарқанд вилояти Булунғур тумани ички йўлининг 4Р-47 автомобиль йўлининг 3-километрида Damas русумли автомобиль ҳаракатланиб келаётган велосипедни уриб юборди. Оқибатда велосипедчи олган тан-жароҳатлари натижасида воқеа жойида вафот этди. Ҳайдовчи эса туман тиббиёт бирлашмаси шифохонасига ётқизилган.
Аниқланишича ЙТҲ содир этган Damas автомобили 2020 йилда ишлаб чиқарилган бўлиб, 2020 йил 29 август куни Давлат ЙҲХБ рўйхатдан ўтган.
«Давлат аҳамиятига эга 4Р-47 автомобиль йўлининг умумий узунлиги 80 километрни ташкил этади. Шундан 0 дан 33-километригача Булунғур туманидан ўтган бўлиб, Булунғур тумани йўлларидан фойдаланиш унитар корхонаси томонидан хизмат кўрсатилади.
Бевосита ЙТҲ содир этилган 3 ва 4-километр оралиғида йўлнинг 300 метр қисми жуда ҳам тор. Бунинг сабаби йўлнинг икки четида аҳоли турар жойлари зич жойлашган. Йўл тунги ёритиш чироқлари билан жиҳозланмаган. Йўлнинг икки томонидан тротуар мавжуд, лекин тротуар ҳам таъмирга муҳтож.
Йўл иккита ҳаракатланиш бўлагига эга. Икки йўл қатнов қисми ўртасидан узлуксиз йўл чизиғи билан ажратилган. Лекин бу чизиқни ҳам янгилаш лозим бўлади», – дейди Самарқанд вилояти ИИБ ЙҲХБ ходими Холжигит Умаров.
Булунғур тумани йўллардан фойдаланиш унитар корхонаси ходими Рашид Маматқулов ҳақиқатан ушбу йўл талабга жавоб бермаслиги ҳамда йўлда тунги ёритиш чироқлар йўқлигини тасдиқлади.
«Йўлларимизга босқичма-босқич ёритиш чироқларини қўйиб келяпмиз. Йўл 2021 йилда кенгайтирилади. Ёритиш чироқлари эса 2021 йил 1-чорагида ўрнатилади», – дейди Рашид Маматқулов
Ҳолат юзасидан туман ЙҲХБ томонидан суриштирув ишлари олиб борилмоқда.
Аввалроқ Юқори Чирчиқда «Жигули» ҳайдовчиси икки нафар пиёдани уриб юбориб, воқеа жойидан қочиб кетгани ва жабрланувчилар вафот этгани, Фарғонада Lacetti уриб юборган 8 ёшли қизалоқ шифохонада вафот этгани ҳамда Сурхондарёда ўзига тегишли бўлмаган машинани бошқарган ҳайдовчи икки кишининг ўлимига сабабчи бўлгани ҳақида хабар берилганди.
Изоҳ (0)