Telegram’да UzAuto Motors компанияси томонидан ишлаб чиқарилган янги енгил автомобилларни олиб кетаётган автовоз аварияга учрагани тасвирланган видео тарқалганди. «Gazeta.uz»нинг «Ўзавтосаноат» ахборот хизматига таяниб, хабар беришича ҳодиса 24 октябрь куни Бухоро вилоятидаги А-380 трассада Газли шаҳри яқинида содир бўлган.
Икки нафар ҳайдовчи томонидан навбатма-навбат бошқариладиган MAN автовози UzAuto Motors’нинг Урганч шаҳридаги дилерлик марказига 5 та Cobalt ва 3 та Nexia олиб кетаётган вақтида унинг тиркамаси «КамАЗ» юк машинасига урилган. Тарқалган фотосуратлардан «КамАЗ»нинг қопланган қум олиб кетаётгани ойдинлашади.
«Суриштирувлар давомида «КамАЗ» ҳайдовчиси ухлаб қолиши оқибатида бошқарувни йўқотгани, оқибатда икки юк машинаси ҳамда атовоздаги енгил автомобилларга шикаст етгани маълум бўлди. ЙТҲда ҳайдовчиларнинг ҳеч бири жароҳат олмаган», — дейилади хабарда.
Бухоро вилояти Ромитан тумани ЙҲХБ ҳодиса юзасидан терговга қадар суриштирув ишларини олиб бормоқда.
«Ўзавтосаноат» ЙТҲ оқибатида жиддий зарар етган UzAuto Motors автомобилларининг мутахассислар зиён миқдорини баҳолаганидан кейин заводга утилизация қилиш учун юборилишини билдирган.
Эслатиб ўтамиз, UzAuto Motors ва Монополияга қарши курашиш қўмитаси ўртасидаги автомобиль нархлари билан боғлиқ суд жараёни 2 октябрь кунидан буён давом этмоқда. 9 октябрда ўтказилган суд мажлисида UzAuto Motors товарлар нархини шакллантириш махфий ҳужжатларга асосланганини билдирган ва суд 16 октябрдаги мажлисда ишни ёпиқ тартибда кўришни бошлаган.
Изоҳ (0)