Россияда пандемия бошидан буён 91 нафар депутатлар COVID-19 га чалинган. Meduza’нинг хабар беришича, бу ҳақда Россия Думаси спикери Вячеслав Володин президент Владимир Путин билан учрашувда маълум қилган.
Володиннинг сўзларига кўра, айни пайтда депутатларнинг 38 нафари касал, улардан бири жонлантириш бўлимида ётибди. Спикер, шунингдек, депутатлардан бири коронавирусдан вафот этганини ҳам эслатиб ўтган.
Вячеслав Володиннинг таъкидлашича, Дума карантинга кета олмайди ёки кўплаб Европа парламентлари каби йиғилишларнинг бутунлай онлайн шаклига ўта олмайди. Чунки Думадагилар президент ҳар куни вазиятни назорат қилиб туришини, депутатлар ўз навбатида ҳисобот бериб туришлари кераклигини тушунади.
Шу билан бирга, қўмиталарнинг алоҳида йиғилишлари кейинчалик бари бир онлайн форматга ўтказилиши мумкинлигини айтган.
Россия Думасида жами 450 нафар депутат бор.
Эслатиб ўтамиз, мамлакатда 26 октябрь ҳолатига кўра, коронавирусга чалиниш бўйича 17 347 та янги ҳолат қайд этилиб, касалланганларнинг умумий сони 1 531 224 нафарга етди.
Россияда жами касалланганлар сони 1,5 миллиондан ошганига қарамай ҳукумат мамлакатда коронавирус тарқалиши туфайли қатъий чекловларни жорий қилишни режалаштирмаяпти. «Роспотребнадзор» раҳбари Анна Попова Россияда касалланишнинг ортишини йилнинг совуқ мавсуми бошлангани билан боғлаган. Шунингдек, бунга таъсир қилувчи омиллар қаторига фуқароларнинг таътилдан ва ишга қайтганлигини киритган.
«Роспотребнадзор» Эпидемиология марказий илмий-тадқиқот институти директорининг тадқиқот ишлари бўйича ўринбосари Александр Горелов Россияда март ойигача коронавирус билан касалланишлар сони камайишини тахмин қилган. Гамалея номидаги Миллий эпидемиология ва микробиология илмий-тадқиқот марказининг яширин инфекциялар микробиологияси бўлимининг собиқ раҳбари, профессор, вирусолог Виктор Зуев эса мамлакатда эпидемиологик вазият 2021 йил ёзида барқарорлашади, деган фикрда.
Изоҳ (0)