Apple компанияси 23 октябрь куни iPhone 12 смартфонлари савдосини бошлади ва шундан буён интернетда янги қурилмага оид турли тестлар кўпаймоқда. Бу сафар iPhone 12 сувда чўкмаслик бўйича синовдан ўтказилиб, унинг натижалари iPhone 11’ники билан таққосланди, деб хабар беради IXBT.
Иккала смартфон ҳам IP68 рейтингига эга бўлса-да, Apple уларга турлича таъриф беради. Apple’нинг расмий сайтида iPhone 11’ни сувдан ҳимоялаш бўйича қуйидаги маълумотлар келтирилган:
«iPhone 11 сув ва чанг таъсирларига чидамли ҳамда махсус лаборатория шароитларида синовдан ўтказилган. iPhone 11 IEC 60529 стандарти бўйича IP68 рейтингига эга (2 метрли сув остида 30 дақиқагача тура олади)».
«iPhone 12 ва iPhone 12 мини сув ва чанг таъсирларига чидамли ҳамда махсус лаборатория шароитларида синовдан ўтказилган. Қурилма IEC 60529 стандари бўйича IP68 рейтингига эга (6 метрли сув остида 30 дақиқагача тура олади)».
Иккинчи босқичда эса iPhone 12 ва iPhone 11 5,49 метрли чуқурликка туширилган. Смартфонлар мазкур синовдан ҳам муваффақиятли ўтган. Аммо блогер бу билан тўхтаб қолмай, смартфонларни 9,14 метр чуқурликка туширган. 21 дақиқали синовдан сўнг iPhone 12 ва iPhone 11 ишлашда давом этган.
Таъкидланишича, смартфонларнинг бу каби синовларга бардош бериши уларни ҳар куни бундай шароитларда синаш лозимлигини билдирмайди.
«Табиий ейилиш давомида сув ва чангга бардошлилик пасайиши мумкин. Нам iPhone’ни қувватлантиришга уринманг: уни фойдаланувчи қўлланмасида келтирилган тавсия бўйича яхшилаб артинг. Суюқлик орқали етказилган зарар кафолат билан қопланмайди», — дейилади Apple маълумотида.
Аввалроқ таниқли сураткаш Остин Манн янги iPhone 12 Pro'ни синовдан ўтказиб, унинг олдинги аждоди — 11 Pro'дан нимаси билан фарқ қилишини кўрсатиб берганди.
Изоҳ (0)