2020 йилнинг октябрь ойи охирларида Alfa Romeo B.А.Т 5, 7 ва 9 концептуал автомобиллари RM Sotheby’s аукциони орқали сотувга қўйилади. Ўтган асрнинг 50 йилларига тегишли учта машина битта лот орқали сотилади, деб хабар беради Motor.
Alfa Romeo Berlina Aerodinamica Tecnica номи остида чиқарилган «трио» Италиянинг Bertone ательеси томонидан яратилган бўлиб, кузовлари аэродинамик соҳасидаги сўнгги янгиликлар билан ўзгартирилган. Шу билан бирга, модель кўрсаткичлари ҳар сафар яхшиланиб борган: беш рақами остидаги купенинг қаршилик коэффициенти 0,23 га, Alfa Romeo B.А.Т. 7’ники эса — 0,19 га тенг.
1953 йилда ишлаб чиқарилган B.А.Т.нинг юриш қисми Alfa Romeo 1900 Sprint’ники каби ва 90 от кучига эга тўрт цилиндрли моторга эга бўлган. Машина соатига 200 километр тезликка қадар ҳаракатлана олади. B.А.Т. 7 эса бир йил кейинроқ тақдим этилган бўлиб, «бешинчи» моделдан ингичка ҳаво ўтказувчи панжаралари, пастроқ капоти ва узайтирилган қуйруқ қанотлари билан ажралиб туради.
Мавзуга доир: АҚШдаги гаражларнинг биридан 40 йил ҳаракатсиз сақланган 5 та Alfa Romeo коллекцияси топилди (фото)
Учта автомобилнинг энг сўнггиси — Alfa Romeo B.А.Т. 9 1955 йилда ишлаб чиқарилган бўлиб, «товар» моделига максимал ўхшаш. Автомобиль фирманинг радиатор панжарасига эга бўлган, олд оптикаси кўтарилиб ёнга силжиган, орқа қанотлари эса кичрайтирилган.
Учала автомобилни 1989 йилда исми ошкор этилмаган харидор сотиб олган. Орадан 30 йил ўтиб машиналар 28 октябрь куни ўтказиладиган аукционда сотилади. Ушбу «трио» 14-20 миллион доллар оралиғида баҳоланмоқда. Харидор бонус сифатида бир нечта картинага, жумладан, таниқли абстраксионист Марк Ротконинг картиналарига эга бўлади.
Изоҳ (0)