Сурхондарёда каналга тушиб кетган Nexia-3’да ёнғин чиқди. Ҳодиса оқибатида бир оиланинг тўрт аъзоси ҳалок бўлди

Сурхондарё вилоятида каналга тушиб кетган Nexia-3’да ёнғин чиқиши оқибатида 4 киши вафот этди, дея хабар бермоқда ЙҲХББ.

Маълум қилинишича, 2020 йил 18 октябрь куни соат 23:00 да Сурхондарё вилояти Ангор тумани «Қорабоғ» маҳалласи ҳудудидан ўтувчи М-39 автомобиль йўлининг 1433-километрида йўл-транспорт ҳодисаси содир бўлди.

Қайд этилишича, 1993 йилда туғилган ҳайдовчи Nexia-3 машинасини Самарқанд–Термиз йўналишида ҳайдаб кетаётиб, бошқарувни йўқотиши натижасида йўналишдан чиқиб кетган ва йўл бўйлаб оқиб ўтувчи каналга тушиб кетган. Натижада автомобилда ёнғин келиб чиққан.

Натижада транспорт воситаси ҳайдовчиси И.И., унинг 1993 йилда туғилган турмуш ўртоғи Ф.А. ҳамда вояга етмаган фарзандлари — 2016 йилда туғилган С.Ў. ва 2017 йилда туғилган С.И. оғир даражадаги тан жароҳатлари олиб воқеа жойида вафот этган.

Мазкур ҳолат юзасидан 2020 йил 19 октябрь куни Ангор туман ИИБ ҳузуридаги тергов бўлими томонидан Жиноят кодексининг 266-моддаси 3-қисми «а» (одамлар ўлимига олиб келган транспорт воситалари ҳаракати ёки улардан фойдаланиш хавфсизлиги қоидаларини бузиш) банди билан жиноят иши қўзғатилиб, тергов ҳаракатлари олиб борилмоқда.

Аввалроқ Жиззахда ёритиш чироқларисиз ҳаракатланган Cobalt юк машинасига урилиши оқибатида бир киши, Фарғонада автомобиль бошқарувини йўқотиб, дарахтга урилган 16 ёшли ҳайдовчи, Андижонда Damas юк машинасига урилиши оқибатида вояга етмаган йўловчи ва Чилонзорда автомобиль бошқарувини йўқотиб, дарахтга урилган 21 ёшли ҳайдовчи ҳалок бўлгани ҳақида хабар берилганди.