Элдор Шомуродовнинг Италиядаги саргузаштларини бошлаб берадиган «Верона» — «Женоа» учрашуви ҳақида

Италия А Сериясининг 4-турини 19 октябрь оқшомида бўлиб ўтадиган «Верона» — «Женоа» учрашуви якунлаб беради.

Мазкур баҳс генуяликлар учун коронавирус билан боғлиқ муаммолардан кейинги илк учрашув бўлади. «Женоа»да уч ҳафта аввал COVID-19 билан зарарланган илк футболчи аниқланганди, шундан кейин жамоа «Наполи»га қарши кучсизланган таркиб билан тушди ва 0:6 ҳисобидаги мағлубиятни қабул қилиб олди, «Торино»га қарши ўйин қолдирилди. 19 октябрь, оқшомида эса «Женоа»ни осон бўлмаган рақиб кутиб турибди. «Дарё» Элдор Шомуродов учун Италиядаги илк қадам бўлиши кутилаётган ўйин ҳақидаги маълумотларни тақдим этади.

«Женоа»нинг ўйин услуби ҳақида

Генуя шаҳрининг бош жамоаси ёзги трансферлар ойнасида таркибда янгиланишлар қилди. Эски ҳужумчилардан фақат Горан Пандев қолди. Шунингдек, эркин агент мақомида Маттиа Дестро келган бўлса, «Ювентус»дан Марко Пьяца ижарага олинди.

«Женоа» 3-5-2 услубида тўп суради: икки ҳужумчи прессингда ўйнайди ва рақиб жарима майдони атрофида фаол ҳаракат қилади, қанот латераллари уларни узатмалар билан, марказий ярим ҳимоячилар эса узун паслар билан  таъминлайди. Учрашувда қанот вакиллари Шомуродовга сифатли узатмалар амалга ошириб беришга ҳаракат қилади.

Бироқ мураббийлар штаби таркибдаги йўқотишлар сабаб услубни 4-4-2 га ҳам ўзгартиришга мажбур бўлиши мумкин. Сабаби жамоанинг кўплаб ярим ҳимоячилари бу ўйинда қатнаша олмайди.

«Верона» ҳақида

2018/19 йилги мавсумда Б Сериядан олий дивизионга қайтган вероналиклар 2019/20 йилги мавсумни 11-ўринда якунлаганди.

Жамоа 2020/21 йилги мавсумни кўтаринки руҳда бошлади. Жамоа биринчи турда «Рома»ни 3:0 ҳисобида доғда қолдирди. Кейин эса «Удинезе» таслим этилди. Бироқ жамоа 3-турда «Парма»га енгилди.

«Верона» асосан тажрибали футболчиларга таяниб ҳаракат қилади, жамоада 30 ёшдан ошган ўйинчиларнинг сони жуда кўп. Улар орасидан Никола Калинични алоҳида ажратиб кўрсатиш мумкин. Хорватиялик футболчи ёзда вероналиклар сафига келиб қўшилганди.

Айтганча, бир вақтлар ушбу жамоада сафида ўзбекистонлик собиқ футболчи Илёс Зейтуллаев ҳаракат қилган.

Элдор Шомуродов дебют қиладими!?

Одатда янги футболчилар жамоага бироз мослашиб олгач майдонга ташланади, шунда ҳам дебютантлар кўпинча дастлабки ўйинини захира ўриндиғида бошлайди. Бироқ Элдор билан бунинг акси бўлиши катта эҳтимол. Коронавирус сабаб жамоада юзага келган кадрлар муаммоси сабаб Шомуродов бугунги ўйинни асосий таркибда бошлаши эҳтимоли жуда юқори. Генуяликлар устози Роландо Мараннинг таъкидлашича, Элдор сўнгги 5-6 кун ичида энг кўп шуғулланган ўйинчи. Шунингдек, Ўзбекистон сингари бутун Италия ўзбек футболчисининг дебютини кутмоқда.

Шомуродов Ўзбекистон терма жамоаси сафида Эронга қарши ўртоқлик учрашувида (Элдор бу ўйинда гол муаллифига айланди) иштирок этгач, терма жамоа билан БАА йўл олмаган ва Италия қайтиб кетганди. Шундай экан мураббийлар штаби бу баҳсда ўзбекистонлик тўпурарга ишонч билдириши турган гап.

Ўзаро ўйинлар

Мазкур жамоалар ўзаро тўқнаш келган сўнгги ўнта ўйиннинг олтитасида «Женоа»нинг қўли баланд келган. Учта баҳсда «Верона» зафар қучган бўлса, яна битта ўйинда дуранг қайд этилган. Сўнгги ўйинлардан хулоса қиладиган бўлсак, бу тўқнашувда кўпинча ғолиб номи маълум бўлади. Сўнгги бор бу жамоалар 2014 йилда ўзаро муроса йўлини танлаган.

«Женоа» ва «Верона» ўртасидаги охирги ўйин 2020 йилнинг февралида бўлиб ўтган ва унда генуяликлар 3:0 ҳисобидаги ғалабани қўлга киритган эди. 2019/20 йилги мавсумдаги дастлабки ўйин эса «Верона» ғалабаси билан (2:1) тугаган.

Коронавирус билан боғлиқ муаммо

Бироз вақт олдин «Женоа» коронавируснинг ҳақиқий ўчоғига айланди. Генуяликлар коронавирус сабаб 3-тур доирасидаги «Торино»га қарши ўйинни қолдиришга мажбур бўлди. Жамоанинг 22 вакилида вирус аниқланди, уларнинг 17 нафари асосий жамоа футболчилари бўлди. Бироқ ФИФА кунларидаги танаффус генуяликлар жонига оро кирди. Сўнгги тест натижалари касалланганларнинг ўн нафарида салбий натижа берди. Шу тариқа «Женоа» устози Роландо Маран бу ўйинда Маттиа Перин, Миха Зайц, Иван Радованович, Марко Пьяца, Лука Пеллегрини, Давиде Бираски, Филиппо Мелегони, Валон Беҳрами, Лассе Шёне ва Федерико Marketти хизматларига таяна олади. Бироқ хабарларга кўра «Верона»га қарши ўйинда улардан фақат Перин ва Радованович асосий таркибдан жой олиши мумкин.

«Верона»да эса икки ўйинчи инфекция сабаб ўйинни ўтказиб юборади. Булар: ҳимоячи Корай Гюнтер ва ҳужумкор ярим ҳимоячи Антонин Барак.

Мураббийлар фикри

«Верона» кучли жамоа, улар ҳар қандай рақибга муаммо туғдиради. Кимлар майдонга тушиши ҳозирча аниқ айта олмайман. Сўнгги машғулотдан кейин ҳаммасини аниқ бўлади.

Шомуродов Ўзбекистондан қайтганидан кейинги 5-6 кун ичида ҳаммадан кўп машғулотларда қатнашди. У Италия футболини ўрганишга қаттиқ тиришмоқда ва бунга хоҳиши юқори. Бу жиҳатлар мени хурсанд қилмоқда. Бироқ бу қадар қисқа муддат ичида мослашиш жуда қийин.

Роландо Маран, «Женоа» бош мураббийи

Маран ўзининг кучли мураббий эканини кўрсата олган. Албатта, ҳозир унинг учун қийин палла, бироқ бу жиҳатлар жамоага янда кўпроқ мотивация бериши мумкин. У жуда тажрибали мураббий.

«Женоа»да фақат кимлар майдонга туша олмаслигини биламиз, холос. Уларнинг айрим футболчилари халқаро танаффус вақтида сафга қайтган. Шундай экан, рақибни менсимаслик ярамайди.

Иван Юрич, «Верона» бош мураббийи

Тахминий таркиблар

Италиянинг машҳур нашрлари баҳс учун ўз тахминий таркибларини эълон қилди. Уларнинг барчаси «Женоа» ҳужум чизиғига Пандев ва Шомуродов жуфтлигини қўйган.

Қуйида La Gazzetta dello Sport нашри томонидан илгари сурилган вариант билан танишинг:

Учрашувни қандай томоша қилиш мумкин

«Верона» — «Женоа» учрашуви «Футбол-ТВ» ва Россиянинг «Матч-ТВ» телеканаллари орқали жонли эфирга узатилади.