Андижонда автомобилида ЙТҲ содир қилган ИИБ ходими икки киши томонидан калтаклаган, ҳолат юзасидан жиноий иш очилиб, улар қидирувга берилганди. «Xabar.uz»нинг ёзишича, мазкур жиноят иши бўйича қўшимча маълумотлар пайдо бўлди.
Воқеа 24 сентябрь куни содир бўлган, Андижон шаҳар ИИО ФМБ 1-сонли ИИБ тергов бўлинмаси терговчиси С.Ғ. Damas’ни ҳайдаб кетаётиб бошқарувини йўқотган ва йўл четидаги Spark’га тўқнашган. Бунга жавобан Spark’да бўлган Х.Б. (ҳайдовчи) ва унинг ёнидаги Х.Э. ИИБ капитани С.Ғ. билан жанжаллашиб, унга тан жароҳати етказган. Ҳолат юзасидан воқеа иштирокчиларига етказилган тан жароҳатлари, хусусиятлари ва оғирлик даражасини аниқлаш юзасидан суд-тиббий экспертизаси тайинланган.
Хабарда айтилишича, терговга келишдан бўйин товлагани учун қидирувга берилганлардан бири Х.Э. топилди. У коронавирус юқтириб даволанаётганлиги сабабли терговга кела олмаган. Унинг касалликдан кейинги ҳолати ва оила аъзолари томонидан 30 миллион сўм гаровга қўйганидан келиб чиқиб, қамоққа олиш эҳтиёт чораси гаровга ўзгартирилган.
Шунингдек, жабрланувчига нисбатан тайинланган суд-тиббий экспертизасининг хулосаси маълум бўлди. Қайд этилишича, ИИБ капитанида бош мия ёпиқ шикасти, бош мия чайқалиши, чап томон ғалвирсимон суяк катакчаларининг ёпиқ синиши, бурун тўсиғининг травматик қийшайиши, чап кўз қовоқлари қонталаши, тери ости гематомаси, чап кўз олмаси 2-даражали контузияси, чап чакка соҳаси шилинган жароҳатлари аниқланган бўлиб, мазкур тан жароҳатлари ҳаёт учун хавфлилик даражасига кўра, ўртача оғир тан жароҳатлари туркумига киради.
Изоҳ (0)