Президент Шавкат Мирзиёев журналист Бобомурод Абдуллаевга Тошкент шаҳридаги турар жой мажмуаларининг биридан барча жиҳозлари ва маиший техникалари билан уч хонали квартира ҳадя қилди. Бу ҳақда журналист 18 октябрь куни Facebook’даги саҳифасида видеохабар қолдирган.
Видеохабарга илова қилинган матнда, жумладан, шундай дейилади:
«Шу йил 8 сентябрь куни Ўзбекистон Президенти Шавкат Миромонович Мирзиёев менга Тошкентдаги Green Park турар жой мажмуасидан янги уч хонали квартирани ичидаги барча жиҳоз ва маиший техникаси билан бирга ҳадя қилдилар.Журналист Бобомурод Абдуллаев Ўзбекистон сўровига мувофиқ 8 сентябрь куни Қирғизистонда ҳибсга олинган эди. Кейинроқ, журналистнинг онаси Президент Шавкат Мирзиёевга мурожаат қилгани инобатга олиниб, у 22 август куни муносиб хулқ-атворда бўлиш тўғрисидаги тилхат билан озод қилингани маълум бўлди.Бу уйга 5 октябрь куни кўчиб ўтдик. Бугун Хоразмдан онам келдилар ва Президент ҳадя қилган янги уйни ўз кўзлари билан кўрдилар. Алҳамдулиллаҳ! Президент Шавкат Мирзиёевга катта раҳмат! Аллоҳ у кишидан рози бўлсин!».
Журналистнинг онаси Президентга мурожаатида ўғлини афв этишни сўраркан, унинг «эски уйда оғир, ночор аҳволда яшаши»ни айтган. Бобомурод Абдуллаевнинг аниқлик киритишича, онаси ўз мурожаатида бу гапларни Президентдан уй сўраб айтмаган; онанинг ўзи 18 октябрда эълон қилинган видеомурожаатда Президент уй ҳадя қилишини кутмаганини таъкидлаган.
«Болам менга 8 сентябрь куни шу хабарни айтганида, қотиб қолдим, хурсандчилигимдан тилим айланмай қолди. Президентимизга, юртбошимизга мингдан-минг раҳмат дейман, дунё тургунча турсин! Яратган Эгам ҳамма вақт Президентимизни ўз паноҳида асрасин!», -- деган журналист Бобомурод Абдуллаевнинг онаси.
Эслатиб ўтамиз, Бобомурод Абдуллаев 2017 йилда ҳам Ўзбекистонда конституциявий тузумини ағдариб ташлаш мақсадида фитна уюштириш жиноятида гумон қилиниб, қамоққа олинган эди, 2018 йил май ойида эса суд залидан озод этилган эди.
Изоҳ (0)