Тоғли Қорабоғда юзага келган можаронинг кескинлашуви Туркия томонидан қасддан режалаштирилган ва провокация қилинган. Бу ҳақда «Коммерсантъ» нашри ўзининг ҳарбий-дипломатик манбасига таяниб, хабар берди.
«Сўнгги бир неча ойда Анқара Бокуга ҳар томонлама сиёсий-дипломатик, разведка ва ҳарбий-техника борасида кўмаклашишни ваъда берган ҳолда ҳарбий ҳаракатларни амалга оширишга ундади», — дейилади хабарда.
Маълумотларга кўра, июль—август ойларида Озарбайжон ҳудудида ўтказилган турк—озар ўқув машғулотларидан сўнг мамлакатда қолган Туркия қуролли кучлари гуруҳига Тоғли Қорабоғда операцияни ўтказиш ва режалаштиришда мувофиқлаштирувчи ҳамда йўналтирувчи ролини ўйнаш топширилган.
«Гап 600 нафар ҳарбий хизматчи, жумладан, 200 кишидан иборат баталён тактик гуруҳ, 50 нафар инструктор, Бокудаги 90 нафар ҳарбий маслаҳатчи, Габала авиабазасидаги учиш-техник таркибининг 120 нафар вакили, Далляр аэродромидаги учувчисиз бошқариладиган учиш воситаларининг 20 нафар оператори, Евлах аэродромидаги 50 нафар инструктор, 4-армия корпусидаги 50 нафар инструктор ва Ҳайдар Алиев номидаги ҳарбий билим юрти ва ҳарбий-денгиз базасидаги 20 киши ҳақида кетмоқда», — деб ёзади нашр.
Манбанинг таъкидлашича, ушбу гуруҳ 18 та БМП, битта залп ўт очиш реактив тизими, ўнта автотехника ва 34 та авиация техникасини (6 та самолёт, 8 та вертолёт, 20 тагача дрон) ўз ичига олган бўлиб, Қорабоғ ҳудудидаги ҳарбий разведка ишларини таъминлаган.
Қайд этилишича, сентябрь—октябрь ойларида Туркиянинг ҳарбий-транспорт авиацияси Озарбайжонга парвозларни оширган (транзит Грузия орқали). Ушбу самолётлар шахсий таркибни, жанговар ўқ-дорилар ва тиббиёт воситаларини етказган.
Газетанинг ёзишича, жанговар ҳаракатлар авж олган 28—30 сентябрь кунлари Озарбайжонга қўшимча ҳарбий маслаҳатчилар, хусусан, Туркия мудофаа вазири Хулуси Акар ва қуруқликдаги қўшинлар қўмондони Умит Дюндар етиб келган.
Мавзуга доир:
Изоҳ (0)